Arkiv

Archive for the ‘Qytetet e vjetra shqiptare’ Category

Më mungon Tirana e vjetër (intervistë me Bedri Alimehmeti)

11/10/2014 Lini një koment

Andi Myrte, Gjergji Mima

TIRANË, 7 Prill/ATSH

 

MË MUNGON TIRANA E VJETËR: INTERVISTË/ BEDRI ALIMEHMETI

Tirana e vjetër

Tirana e vjetër

“Vlerat e Tiranës së vjetër tashmë pothuajse janë zhdukur komplet dhe mua më mungon Tirana ime”. I këtij mendimi është njëri prej përfaqësuesve të familjeve të vjetra tiranase, Bedri Alimehmeti, i cili është i mendimit se zhvillimi që ka marrë Tirana nuk duhej të prekte pjesën e vjetër dhe vlerat që mbarte ajo.

“Familja Alimehmeti”, shpjegon, shkrimtari dhe gazetari, autor i dhjetra librave për Tiranën dhe personalitetet e saj, “është një ndër më të vjetrat në Tiranë, e vendosur fillimisht aty ku sot ndodhet sheshi ‘Avni Rustemi” e më pas në zonën e kinemasë “17 Nëntori” dhe megjithatë sot nuk përfillemi fare dhe të paktën në 10 vitet e fundit nuk jemi përfshirë fare në vendimmarrjen për zhvillimin e qytetit nga drejtuesit aktualë të bashkisë”.

Ai shprehet se tiranasit e vjetër, kanë paguar si në kohën e diktaturës edhe tashmë faturën më të lartë të kostos së zhvillimit urban të kryeqytetit dhe se ky fenomen duhet të ndryshojë në të ardhmen.

“Mua më mungon qyteti im vjetër, më ka humbur dhe ndjej dhimbje për qytetin tim, të cilin e kam gjetur në disa qytete, Ulqin, Tivar, Nikosia, në disa qytete greke. Ndërsa këtu në Tiranë çdo vlerë e qytetit të vjetër është shkatërruar, duke bërë që të harrohet historia kulturore, arkitekturore dhe vlerat e këtij qyteti”, shprehet me keqardhje Alimehmeti.

Si banor autokton i Tiranës, Alimehmeti thekson se qyteti tashmë e ka humbur fizionominë e vjetër. “Nuk jam kundër zhvillimit, por mendoj se vlerat e vjetra të qytetit duhet të ishin ruajtur. Tirana ka vuajtur një migrim të jashtëzakonshëm që rrallë e kanë provuar qytetet. Në botë kryeqytetet e vuajnë kudo, por këtu në njëfarë mënyre migrimi solli problemet e pronësisë, e zgjerimit të qytetit etj”.

“Në urbanistikë duket një Tiranë e çorientuar, pasi Tirana pamjen e saj të parë e ka pasur një qytet me vila. Tiranës po i fshihet historia”, shprehet ai.

Sipas Alimehemetit, është dashur ndërhyrja e shoqatës “Tirana” për të shpëtuar mos prishjen e disa rrugëve, në të cilat ishin gati lejet e ndërtimit për pallate, por ku më pas u ndalua ndërtimi dhe prishja e shtëpive karakteristike të qytetit, si rruga “Qemal Stafa”, një prej zonave të pakta ku ende mund të dallohet pjesa e vjetër e Tiranës.

Sipas autorit të librit, “Tirana e përgjakur”, i cili flet për vuajtjet e familjeve të vjetra tiranasa në kohën e diktaturës, “Tirana e re duhej të ndërtohej dhe të zhvillohej duke mos prekur dhe mos prishur vlerat e Tiranës së vjetër, ashtu siç është bërë në shumë qytete të tjera Evropiane”.

Pinjolli i familjes Alimemeti shprehet i indinjuar për mospërfilljen e familjeve të vjetra Tiranase në planet e bashkisë për zhvillimin e qytetir, duke deklaruar se, “ne si familje e vjetër, të paktën gjatë viteve kur kryetari aktual i bashkisë ka drejtuar Tiranën nuk jemi përfshirë fare në venddimmarrje përsa i përket zhvillimit të qytetit, as si banor të vjetër dhe as si shoqata “Tirana”, pjesë e së cilës unë jam prej vitesh. Ndersa si në kohën e Tomor Malasit, i cili ishte kryetari i parë i bashkisë pas viteve 90-të edhe gjatë kohës së Sali Kelmendit dhe Albert Brojkës, kemi qenë të pranishëm në vendimmarrje dhe jemi përfaqësuar edhe në këshill bashkiak. Ndërsa tashmë jemi shpërfillur nga drejtuesit aktualë”.

Përsa i përket zhvillimit të qytetit Alimehmeti shprehet se “Do të dëshiroja që Tirana të zgjerohej dhe të zhvillohet në drejtim të kodrave të Linzës”.

Në përfundim Alimehmeti thekson se në të ardhmen duhet të mendohet më tepër për qytetarët e Tiranës. Kryeqyteti dhe banorët e tij nuk duhet të shihen më thjesht për përfitime politike nga partitë gjatë fushatave, por duhet të ketë një program që të përfshijë në qendër qytetarin dhe në shërbim të tij.

Agjencia Telegrafike Shqiptare

Mëhalla e vjetër (poezi)

25/09/2014 Lini një koment

Bedri ALIMEHMETI

 

MËHALLA E VJETËR

(Poezi)

Tiranë - Çarshia e Vjetër

Tiranë – Çarshia e Vjetër

Eh moj mëhalla ime e vjetër
Kujtimet e tua gjithë balsam
Nuk të ndërroj me asnjë tjetër
Përjetsisht në zemër të kam

Ndën asfalt flenë kalldramet
Aty dhe topi leckës ka mbetur
Tabakët e balonës dhe kallamet
Kurrë jo jo s’kanë për t’u tretur

Ja dhe kukullat e motrës time
Si gjithnjë radhitur tek penxherja
Mbrapa shtëpis kumlla shenjine
Gati trahanaja pret ke tenxherja

Po rrethi i diskut të biçikletës?
Ku do të ketë mbetur kush e di?
Librat e verdhë, historia Kozetës
Filmi “Timuri dhe skuadra e tij”

Kafazi i pëllumbave lart tek hatllat
Gugat hinsi dykaçlyçs pa pushim
Kokbardhi e pullkuqi rrahin flatrat
Nonija te pusi mush ujë me nxitim

Nuk po e gjej krrabën e llastikut
Ku e ke lon çimo e mban mend?
“Shifni t’keqen nona n’moj t’fikut
Atjena e kini lonë jo m’qetër ven”

Skena teatrit, atje poshtë te hajati
Mbi telin e lëverve, perde një çarçaf
Grupi jonë: unë, çimi, Niku e Taqi
“Shërbtorin e dy zotnive” do shfaq

S’ka llafe të gjithë me bileta
Jari i shet tek shtylla leterikut
Gocat lejnë lojën me peta
Hall Netit i këputet litari çikrikut

Moma përkul tek makina qepse
Gjyshi mbi pastiqe këndon Kuran
Nonija në dorë me lugën qepshe
“Qyqja, s’paska farë kosi n’filxhan!”

Gocat kapin marë punët e shpisë
Shkunin qylymat, pastrojnë oborrin
Usta Bërhimi në mojë të çatisë
çikat nji nga nji me kujdes i mori

Dasëm, gjithë mëhallja u tund
Martohet Seri, perria me dy gërsheta
Bukuri e saj nuk gjendet kërkund
Shtatin selvi, sytë e vetllat e zeza

Synetlliqe, gjithë verës papushim
Vlon kënga e ahengu nëpër oborre
Rrem Mumajesi në mandoll xhind
Rrem Gurra mjeshtër në qemone

Burrat n’karrike oborrit për rreth
Nuset këndojnë “Tufa-tufa zerdeli”
Berberi gatitet, briskun mirë mpreh
“Njefshi ei martofshi çunat synetli”

Degët e monit po tunden fort
“Majeni mirë çarçafin t’keqen nona
Asnji kokërr t’mos na bjeri m’tokë
Të hani e të kënoqeni me mona”

Po ai çuni i vogël, ç’ka që po qa?
Kush e rrafi, iu thafshin dy durët?
Buka me voj e krypë nga dora i ra
Puthe tre herë lali dhe vene ke gurët

Mëhallë e shtrenjtë tek rruga trenit
Shkolla jonë tek Dervish Hatixheja
Me emrin simbol “Lidhja e Prizrenit”
Në rrjesht të gjithë me rroba të reja

Nga zërat tanë oborri gumëzhin
Ne me çanta lecke, gocat me përparëse
Oh zilja ëmbël-ëmbël po tringëllin
Pa zhurmë brënda, klasë pas klase

Eh moj mëhalla ime e vjetër
Kujtimet të gjitha m’u zgjuan
Nuk di për ty ç’të të them tjetër?
Tashmë, kur kaq e kaq vite shkuan…

 

—————-
Tiranë, Shtator 2014

Qyteti 400 vjeçar që u themelua nga xhamitë

14/02/2014 1 koment

Ferit LIKA

 

QYTETI 400 VJEÇAR QË U THEMELUA NGA XHAMITË

 

Tirana moderne përpiu gjithçka, gjithçka nga e kaluara e saj, nga historia, nga vlerat dhe bukuritë e dikurshme. E sot në këtë 400 vjetor të themelimit të saj teksa ecën nëpër rrugët e kryeqytetit nuk sheh më asgjë që të të kujtojë të kaluarën apo historinë që i dha jetë këtij qyteti.

Përpjekjet për ruajtjen e trashëgimisë kulturore e shpirtërore të shqiptarëve janë pothuajse inekzistente. Ndërtesat dhe godinat hisorike, objektet e kultit, tirana e fortifikimeve historike, kalatë, sheshe e lulishte, e gjithçka tjetër që i jep kryeqytetit një dimension real të trashëgimisë së vërtetë të tij, duket se shekujt i rrënuan.

Kryeqytetit janë përpjekur t’ia fshijnë historinë e tij, t’ia minimizojne gjurmët që shkojnë shumë më përtej kohës kur u themelua zyrtarisht. E me sa duket ia kanë arritur, pasi vetëm një pjesë e vogël e kësaj trashëgimie njihet, e pjesa tjetër është kthyer në një gojëdhënë.

 

Xhama e Sulejman Pashës, 1917

 

Kryeqyteti i Shqipërisë u ngrit shekuj më parë, mbi themelet e një xhamie. Ishte viti 1614, kur Sulejman Pashë Bargjini, beu i Mulletit, vendosi të themelojë një qytet të ri, Tiranën, duke ngritur kështu edhe ndërtesën e parë të këtij qyteti, Xhaminë e Vjetër. Së bashku me të ai ndërtoi edhe një hamam, një shtëpi për imamin dhe një furrë buke, në vendin ku sot ngrihet monumenti i partizanit të panjohur.

Fakte e të dhëna historike tregojnë se asokohe Tirana ishte një fshat i vogël, me disa stane dhe banesat e përkohshme të barinjve, diku me rreth 15 Shtëpi, e rrethuar nga fshatra të mëdhenj me tregje e me faltoret e tyre.

Banorët e fshatrave përreth filluan të zbrisnin në qytetin e Pashës e të ndërtonin banesat e tyre, ku vendi për ndërtimin e shtëpisë dhe një kopsht përpara saj u jepej falas. Kështu, Xhamia e Sulejman Pashës do të bëhej epiqendra e një qyteti të ri me emrin Tiranë, e cila dalëngadalë filloi të merrte fizionominë e një qytetit të vërtetë.

Historiani Agim Bardhi tregon se kjo xhami ishte epiqendra e qytetit. “Rreth saj kishte disa xhami të tjera, Xhamia e Ethem Beut, Xhamia e Stërmasit tek Pazari i vjetër, Xhamia e Metfirës, aty ku është gjimnazi Sami Frashëri, Xhamia e Kokonozit tek Pazari i Ri, Xhamia e Karapicit përballë pallatit të Kulturës, por xhamia e vjetër ishte më impozante dhe me e rëndësishme. Ku për qindra vite u organizuan festat më të rëndësishme të popullit të Tiranës”, tregon hisotriani Bardhi.

Lidhur me emrin e qytetit të ri, ekzistojnë legjenda dhe gojëdhëna të ndryshme, ku thuhet se emri i është vënë nga vetë Sulejman Pasha. Në variante të tjera, thuhet se emri i Tiranës bashkë me qytetin ka ekzistuar shumë kohë më përpara se beu i Mulletit të zbriste aty.

 

1462928_597134530321747_346292399_n

 

Me shtimin e popullsisë filloi të zgjerohej edhe qyteti i ri, e rrjedhimisht, u shtuan dhe objektet e kultit. “Trualli mbi të cilin zunë vend tashmë këto objekte, ishin zemrat e lagjeve, dhe shpesh ato shërbyen si pika kyçe referimi për njerëzit, ku mblidheshin për të ndarë gëzimin me njëri-tjetrin, apo për të zgjidhur hallet e problemet e tyre”, tregon z. Bardhi.

Udhëtarë, gjeografë, historianë e konsuj të shumtë që kanë kaluar asokohe ndër viset e tona, flasin për ekzistencën e kahershme të xhamive në Tiranë, për bukuritë e tyre, funksionin dhe rolin qëndror, që ata kishin në jetën e qytetarëve.

“Ka xhamia, hane, hamame, ka carshinë dhe sheshin e pazarit, vreshtët dhe kopshtet janë të panumërta. (Evlija Çelebi, udhëpërshkrues turk, 1662)

“Tiranës i bien në sy, në radhë të parë, xhamitë e saj të stolisura me ngjyra të shkëlqyera dhe elegante, që u japin një tërheqësi të panjohur në faltoret e këtyre viseve.”  (Eduard Lir, piktor dhe udhëpërshkrues anglez 1848)

” …Tirana është një qytet i sheshtë, me rrugë të gjera me shumë ujëra të rrjedhshëm, me një carshi të madhe dhe me gjallëri. Kur hyn në qytet nga rruga e Shkodrës shihen dy xhami të bukura. Ka disa xhami e mesxhide të tjera dhe dy medrese…” (Sami Frashëri,  Kamus al Alam 1892)

Dy lagjet më të hershme të Tiranës për të cilat ekzistojnë informacione e të dhëna që në shekullin e 17, janë Lagja e Mujos, për të cilën thuhet se ka qenë lagja me e lashtë e Tiranës dhe ajo e Pazarit, të cilat kishin xhamitë e tyre dhe ndërtesat përreth nuk e kalonin lartësinë e xhamive, e ndërsa sot ndodh krejt e kundërta. Minaret e atyre pak xhamive të mbtura apo të ndërtuar rishtazi mezi shquhem mes pallateve shumkatëshe.

Në fillim të shekullit të 18-të, Tirana kishte filluar të zgjerohet edhe nga ana veriore e pazarit, lagjet dhe mëhallat morën emrat e xhamive, që u ndërtuan brenda tyre, në vendet më të zgjedhura, si mëhalla e Sulejman Pashës, e Mujos, e Fires, e Zajmit, më vonë mëhalla të tjera si ajo e Karapicit, Bërxollit, Kakonosit, Vathit, Tabakëve dhe e Terzive. Zemrën e qytetit të Tiranës e përbënte Xhamia e Vjetër me sheshin rreth saj. Rruga e sotme e Barrikadave, dikur përbënte aksin kryesor të strukturës urbanistike të qytetit. Anës saj qenë rreshtuar përveç Xhamisë së Vjetër edhe disa institucione të tjera islame.

Gjatë shekujve 15, 16 dhe 17, xhamitë bëhen objekte përcaktuese në ndërtimin e qendrave të qyteteve. Ato ndërtoheshin në pjesën më aktive të qytetit, pranë tregut dhe ndërtimeve të tjera publike të rëndësishme. Historianë, arkitektë e studiues të shumtë, thonë se qyteti i Tiranës u ngrit dhe u ndërtua mbi katër bërthama kryesore.

Bërthama e parë e qytetit lindi dhe hodhi shtat së bashku me xhaminë e vjetër të Sulejman Pashës në vitin 1614, në qendër të Tiranës. Bërthama e dytë e qytetit u krijua në fillim të shek. 18, rreth xhamisë së Firës, 600 m në Veri-Perëndim të xhamisë së parë, në vendin ku sot është shkolla Jeronim De Rada. Bërthama e tretë ndërtohet rreth xhamisë së Zaimit në 1775, në verilindje të xhamisë së vjetër. Bërthama e katërt nis me fillimin e ndërtimit të xhamisë së Et’hem Beut në vitet 1794-1821, e vendosur aty ku ndodhet edhe sot e kësaj dite. Veç kësaj në qendër të çdo lagje kishte një xhami, si ajo e Stërmasit në vitin 1840, e Karapicit më 1858, e Kokonozit dhe e Bërxollit të shek. XIX, Xhamia e Mujos, e Reçit e kështu me radhë.

Xhamitë, si ndërtesa që i shërbenin masës së gjerë të qytetarëve, morën edhe një zhvillim të madh arkitektonik me një pasuri të madhe artistike e përbërë nga dekoracione me motive floreale, me peizazhe të pikturuara dhe gdhendje druri e guri në kolonat, kapitelet, tavanet, mafilet, etj., duke u bërë një vlerë e jashtëzakonshme kulturore.

 

Xhamia e Vjeter (1)

 

Historiani Bardhi shprehet se “Xhamitë e Tiranës përveç vlerave religjioze kishin edhe vlera të mëdha artiskike, ndoshta xhamia e Ethem Beut për shumë arkitektë është shprehja e xhamisë me elegante dhe më të bukur jo vetëm të Shqipërisë por edhe më tej.Me zhvillimin e ekonomik të Tiranës, edhe xhamitë ndërtoheshin të bukura, me minare elegante e me zbukurime të shumta, ku edhe këtu dallohet xhamia e Ethem Beut për elegancën e saj dhe për pikturat murale, që mbeten edhe sot një bukuri e jashtëzakonshme me vlera të pakrahasueshme me xhamitë e tjera. Ajo ka elemente edhe të artit perëndimor. Thonë që Haxhi Ethem Beu, ka qenë një njeri që njihte mirë jo vetëm lindjen por edhe perëndimin dhe piktorët që kanë pikturuar një pjesë të kësaj xhamie ishin nga Dalmacia (Italia).”

Të gjithë ato që fati i solli nga këto anë, nuk nguruan të përshkruanin bukuritë e tyre. Konsulli frëng në Shkodër A. Degrand, kur vizitoi Tiranën në vitin 1901, do të shkruante:

“Xhamitë e Tiranës janë të mbushura të gjitha me zbukurime dhe piktura me ngjyra kaq të gjalla, sa në ditët me diell krijonjnë një ndjesi gazmore. Nuk ka qytet tjetër në shqipëri, nga sa kam parë, që të shfaqë një karakter kaq intersant”

Ndërsa Edit Durham, në vitin 1904 do të përshkruante kështu Tiranën: “Qyteti ishte jashtëzakonisht i pastër dhe shumë piktoresk. Xhamitë ishin tejmase të bukura, ngjyra ngjyra dhe të pikturuara me peisazhe të mrekullueshme.”

Në fillim të viteve ‘30 Tirana kishte rreth 40 xhami, ndërsa, përpara se komunizmi të shkatërronte ndërtesat e kultit, Tirana, vetëm qyteti, ka patur 27 xhami, e shumë pak prej tyre i shpëtuan “terrorit të kuq”. E ndërsa sot, Tirana është qyteti më i madh i Shqipërisë, qendra më e madhe sociale dhe kulturore e vendit, me një popullsi domunuese myslimane dhe ka vetëm 8 xhami kryesore.

Në të gjithë vendin shumë prona të Komunitetit Mysliman u shtetëzuan dhe u ndërtuan shkolla e ndërtesa të tjera publike. “Në qendër ku sot ndodhet Teatri i Operës dhe Baletit ka qenë Xhamia e Karapicit, tek ushtari i panjohur ka qenë Xhamia e Sulejman Pashës. Tek tregu çam Xhamia e Zelve, sot shkolla Kostandin Kristoforidhi, Xhamia e Beshirëve, sot shkolla Sami Frashri, Xhamia e Haxhi Jasës, sot Materiniteti Geraldinë, Xhamia e Islam Allës, sot  shkolla Jeronim Derada, e shumë të tjera në vend të të cilave janë ndërtuar godina shumëkatëshe”, tregon myftiu i Tiranës Ylli Gurra.

Xhami që mbanin mbi vete copëza të rëndësishme të historisë së Tiranës, u shkatërruan sistematikisht, për të shkëputur lidhjet me të kaluarën dhe t’i përgjigjeshin kushteve dhe rrethanave të reja, të krijuara nga ideologjia komuniste.

Xhamitë nuk  luanin vetëm rolin e tyre primar, atë të vendkryerjes së adhurimit, ato luan gjithashtu edhe nje rol të madh social. Lidhur më këtë sociologu Gëzim Tushi nënvizon se “Xhamitë janë institucione të dorës së parë të rëndësishme me vlera sociale të pallogaritshme, me vlera humane shumë të mëdha, me vlera purifikuese, të shpirtit të njeriut duke e bërë ata më të mirë e më njerëzorë. Unë jam i bindur që në institucionet e kultit mysliman, në xhamitë,  gjithnjë e më shumë predikohet humanizmi, solidariteti, mbështetja e të varfërve, mbështetja e njerëzve në nevojë, lidhjet humane mes njerëzve, në këtë pikëpamje dobia e tyre sociale është shumë e madhe. Shoqëria shqiptare pret shumë prej tyre, janë institucionet më të rëndësishme dhe më të vjetra të qytetërimit në këtë pikëpamje do të dëshiroja një kujdes më të madh për to, një përmirësim të kushteve.”

 

Ethem Beu - Janar 2013 (3)
Xhamia Ethem Bej, Janar 2013

 

Pas viteve ’90, gradualisht në Tiranë filloi “modernizimi” edhe ato pak objekte që kishin mbetur po u zihej fryma nga betonizimi. Gjatë kësaj kohe u vunë në funksionim disa xhami, ndërmjet tyre vetëm Xhamia e Et’hem Beut ishte mirëmbajtur si muze, e cila sot është më e frekuentuara nga vizitorët vendas dhe të huaj, për shak të bukurisë dhe historisë që ajo mbart mbi supe. Ndërsa xhamitë  e tjera të si ajo e Kokonozit, e Tabakëve dhe ajo e rrugës së Kavajës, patën nevojë për investime të mëdha për t’i kthyer në identitet. Sot kapaciteti i tyre është dyfishuar. Më vonë u ndërtuan edhe xhami të reja si ajo e Xhurës tek “Oxhaku”, xhamia në bllokun e ndërtesave të Al’Maku-t dhe INSIG. Është përshtatur mjaft mirë për falje edhe një sallë në Medrese, që quhet Xhamia e Medresesë, që u nis vetëm për nxënësit e shkollës, por në të kryejn ritet fetare edhe shumë nga banorët e lagjes.

“Në kushtet e sotme të jetës moderne institucionet e kultit fetar janë shumë të rëndësishme dhe kanë një vlerë të madhe. Moderniteti ka sjellë shumë probleme, shumë paqëndrueshmëri dhe njerëzit kanë nevojë të gjejnë burime të sigurta të orientimit social, dhe institucionet fetarë janë unikale për sa i përket orientimit dhe ndikimit në shpirtin e njeriut. Në Shqipëri po vihet re gjithnjë e  më shumë lidhja e njerëzve me objektet e kultit, kryesisht xhamitë. Sa më shumë xhami të ketë, sa më të përhapura të jenë ato, aq më mirë është, pasi në këtë kohë moderne nuk është e lehtë ti mbledhësh njerëzit ashtu siç bëjnë objektet të kultit, konkretisht xhamitë”, shprehet z. Tushi.

Realiteti është i dhimbshëm, të gjitha ato objekte kulti që i dhanë jetë kryeqytetit, u ndoqën nga zinxhiri shkatrrimtar, ku identiteti dhe historia u përçmuan, u rrënuan, u grabitën. Por ajo që nuk mund të shuhet është se banorët e këtij qyteti janë të vetëdijshëm se gurëthemeli i parë i Tiranës është Xhamia e Vjetër, ajo e cila i dha frymë dhe jetë qytetit.

Ndoshta një rreze shprese ka mbetur ende. Ajo është Xhamia e Namazgjasë, edhe pse peripecitë për të mesa duket nuk kanë të sosur, ajo premton të ngrihet mbi themelet e traditës dhe kulturës së hershme islame shqiptare, që do të mishërojë edhe traditën e gjatë dhe origjinale të xhamive tona,  e duke i rikthyer sadopak trashëgiminë e humbur kryeqytetit të shqiptarëve.

 

(Revista Drita Islame, Janar 2014)

 

Ethem Beu 1938

Xhamia Ethem Beu, Marubi, 1938

 

 

Pazari i Vjeter

Xhamia e Karapicit dhe Ethem Beu

Xhamia e Vjeter (2)

Xhamia Kokonozit - Pazari i ri Tirane - Nentor 2013

Xhamia Dine Hoxha - Nentor 2013

Xhamia Dine Hoxha – Nëntor 2013

Pse është shmangur nga kremtimet 400-vjetori i themelimit të Tiranës?!

02/02/2014 Lini një koment

PSE ËSHTË SHMANGUR NGA KREMTIMET 400-VJETORI I THEMELIMIT TË TIRANËS?!

Tiranë - Çarshia e Vjetër

Tiranë – Çarshia e Vjetër

TIRANE - Vështirë të gjesh një përgjigje për mungesën e kremtimit të 400-vjetorit të Tiranës, por justifikime do të ketë patjetër. Jemi të sigurt se pas këtij shkrimi, shoqata dhe organizime-hijena do ngrihen dhe të thonë se ato e kishin në planet e tyre. Në fakt, duke dëgjuar ato që parashtronte për festimet e këtij viti kryeministri i vendit Rama dhe artikulimet e kryebashkiakut Basha e kupton se kremtimet për Tiranën janë të fundit në interesat e tyre. Jo më kot, dy njerëzit më të fuqishëm të politikës shqiptare, në mandatet e tyre si njerëzit e parë të Tiranës s’e kanë përmendur fare atë…Në këtë intervistë me Gazmend Bakiun, një studiues i apasionuar për qytetin dhe autor monografish për të, zbërthehet i gjithë ky harrim…

A mund të konsiderohet ky vit si 400 vjetori i krijimit të Tiranës?
“Viti 2014 është 400-vjetori i themelimit të qytetit të sotëm të Tiranës. Për këtë nuk ka asnjë dyshim. Viti i themelimit është përcaktuar për herë të parë nga Sami Frashëri në Kamus al-alam (Dictonaire universel dhistoire et de geographie, 1893). Sepse, ai konvertoi saktësisht vitin 1023 hixhri (sipas kalendarit islam) me vitin 1614 pas Krishtit (sipas kalendarit gregorian), vit kur u ndërtua Xhamia e Vjetër, nga Sulejman pashë Bargjini (Mulleti). Kuptohet, ky vit ka kuptim simbolik (sepse smund të ndërtohet një qytet për një vit, pasi formimi i një qyteti të ri është proces që kërkon vite), por ai është i krejtpranuar nga të gjithë studjuesit dhe historianët, vendas dhe të huaj, që nga Sami Frashëri e deri më sot.
Sa më sipër, nuk mohon aspak lashtësinë e trevës së Tiranës, kështjellat, qytetet antike që lidhen me së paku dy kala (Dorëzi dhe Persqopi), Bazilikën e Tiranës (Mozaikun jemi mësuar ti themi), etj. Por, qyteti i sotëm i Tiranës nuk ka lidhje të drejtëpërdrejtë me to, sepse është një akt më vete, që ndodhi 400 vjet më parë, prandaj themi se këtë vit, ai bëhet 400 vjeç”.

Pse autoritetet qoftë lokale dhe qendrore e kanë shmangur nga kalendari i tyre i kremtimeve në këtë vit?
“Pyetje me vend. Kjo vjen sepse krerët e pushtetit qendror dhe lokal e shikojnë Tiranën më tepër si kryeqytet, dhe pak si qytet, në kontekstin historik dhe të traditës. Të zënë me punëra të mëdha, atyre s u bie ndërmend për 400-vjetorin, dhe në e zënçin me gojë, kjo vlen sa për të kaluar radhën (uroj të përgënjeshtrohem!).
Në çdo vend tjetër, përvjetori i 400-të apo i 500-të i çdo qyteti, do të kishte qenë një rast shumë i mirë promocioni, turizmi, aktivitetesh dhe plot mundësish të tjera. Do të ishte një rast shumë i mirë për të promovuar qytetarinë dhe për ngulitur tek çdo kryeqytetas dhe tek çdo pushtetar të vërtetën: “Unë jam tiranas sepse unë jetoj këtu”. Nga kjo, vetëm të fituar do të kishim; edhe qyteti natyrisht”.

Çfarë mund të bëhej me këtë rast?
“Përveç atyre që thashë më lart, do të duhej pikë së pari, të nderohej themeluesi i qytetit, Sulejman Pasha. Monumenti i tij duhet të ngrihet në një piedestal më të lartë, dhe mbase duhet zhvendosur tek trotuari, përpara kafe “Europës”, sepse nuk mund të qëndrojë pranë monumentit të Partizanit, sikur këta të ishin vëllezërit Frashëri. Ndoshta, për Sulejman Pashën duhet bërë një monument i ri, më i arrirë se ky që kemi sot.
Për 400-vjetorin e Tiranës, do të duhej të bëhej një axhendë e plotë, nga një komision i posaçëm, dhe aty mund të vendosej për gjithshka. Por siç duken gjasat do të kemi.

 

(er.nu/Milosao/BalkanWeb)

Do shkoj bari n’rronjë

09/12/2013 Lini një koment

Alba KEPI

 

DO SHKOJ BARI N’RRONJË

Tirana e vjetër

Tirana e vjetër

Nga Sul Bargjini te Revolucioni virtual…

“Do shkoj bari n’rronjë“, është një shprehje që tironsit e përdorin shpesh. Katër fjalë mjaftojnë për të kuptuar mes tyre identitetin historik të çdo familjeje autoktone, pa të cilat kryeqyteti sot nuk ka kuptim.

Do shkoj bari n’rronjë”, mendoi në ditën 16 Muharrem të vitit 1022 (v.1614 në kalendarin e krishterë) trashëgimtari i një prej dyerve më të mëdha të Arbërisë, Sulejman Pashë Bargjini, gjatë rrugëkthimit në atdhe. Dëshira e tij i ktheu jetën rrënjës e i dhuroi filizave të barit vendndodhjen e sotme të këtij qyteti.

“Do shkoj bari n’rronjë”, skaliste vula e M.S. Seit Toptanit në dokumentin historik mes nëntë firmash kundër copëtimit të Shqipërisë e vendimeve të Kongresit të Berlinit. Vit pas viti e shekull pas shekulli, filizat krijuan selvi të larta, e hija e tyre i dha zë burrave patriotë në Sheshin e Namazgjasë, kur vendosën që gjuha shqipe të shkruhej në alfabetin kombëtar. Selvitë rritën shtatin e veshën me histori çdo degë, secila prej tyre i dha kurajon për t’u quajt shqiptarë plot 150 trimave autoktonë, në një kohë kur qeveria turke shpallte të pafe e tradhëtar çdokënd që e pranonte këtë fjalë për vete.

“Do shkoj bari n’rronjë”, thirrën me dhimbje banorët e këtij qyteti, kur në fillim të ’900 pesë shqiptarët tironas; Jusuf Elezi, Mahmud Fortuzi, Hafiz Ibrahim Dalliu, Beqir Luga e Mustafa Mara, u dënuan me 10 vjet burgim për nacionalizmën, shprehur në mendimin e tyre të lirë për të njohur gjuhën shqipe, stemën shqipe, Skënderbeun dhe Shqipërinë të ndarë nga osmallinjtë.

“Do shkoj bari n’rronjë”, ushtonin në fillim të ’900, minaret e 19 xhamive të Tironës, kur si kurrkund në çdo qytet tjetër, lutjet e faljet kryheshin nga 15 hoxhallarë shqiptarë si Beqir Luga, i burgos dy herë nga Durguti e në kohë të rebelët; Sali Fortuzi, Mehmet Maçi, Ahmet Efendi Sauku, Sali Hallulli etj., po të burgos po nga rebelët. Ideali “Do shkoj bari n’rronjë” i mblodhi shqiptarët tironas, kryesuar nga Abdi Toptani me vëllezërit Maz-har, Hamit e Refik për të krijuar në Mirditë qendrën e komitave të kësaj ane në luftë kundër osmanëve.

“Do shkoj bari n’rronjë”, qe sakrifica e tre studentëve tironas të shkollës së Drejtësisë së Selanikut, që u kthyen në Delvinë për të formuar në atë anë Komitetin Nacionalist të kryengritjeve për të çliruar qytetet.

“Do shkoj bari n’rronjë”, e pati emrin kurajo e protestës së shqiptarëve tironas Nikollë Nishku, Sheh Ahmet Pazari, Xhelal Toptani e Fuad Toptani, kur përballë komandantit serb thanë: “Shqipëria është një vend neutral e Tirona ka me shpallë vetqeverimin”.

“Do shkoj bari n’rronjë”, u bë krenaria e këtij qyteti që me zërin e Refik Toptanit në sheshin e nënprefekturës, shpalli pavarësinë kombëtare, dy ditë para pjesës tjetër të vendit e tha: “Dhantë Zoti e u puqshim kështu si sot, gojë ndër gojë, që ashtu të mundemi me e ruejtë atdheun tonë nga të shkelunit e armikut. Rroftë Shqipnia në vete, rroftë vllaznimi, rroftë flamuri ynë kombëtar!”

“Do shkoj bari n’rronjë” buçoi gjoksi i këtij qyteti, kur komunizmi i mohoi gjuhën, dialektin, traditat e artin, avllitë e hajatet ia mbushi me hije bishash, kalldrëmet ia sakatoi me gjak shqiptarie, tjegullat ia krisi me dhimbje nënash. Por, veç muret e odave nuk mundën me i prek, mbi bardhësinë e tyre historia kish shkruar “Do shkoj bari n’rronjë”!

“Do shkoj bari n’rronjë”, është arma e gjithpushtetshme e revolucionit human të një popullsie që prej katër shekujsh, e pse jo ndoshta më tepër, i ka kushtuar Tironës identitetin e një qyteti plot histori, traditë, kulturë e patriotizëm. Bari lëshoi rrënjë, rrënjët zgjeruan shtratin, shtrati lartësoi filizat e filizat mësuan të dashurojnë fjalët;

“Do shkoj bari n’rronjë”. Po mbushet plot një dekadë e fuqia e kësaj dashurie krijoi një revolucion të ri, ndoshta më të fuqishmin në historinë demokratike të një Shqipërie të lirë. Është revolucioni i vendalive të një qyteti të etur për një histori të vërtetë, të shkruar në libra, të vizitueshme në muze, të gdhendur në monumente patriotësh, të ruajtur në kala antike, të mbyllur në sepete kujtimesh.

“Do shkoj bari n’rronjë” bëhet përsëri arma e këtij revolucioni human, por tashmë virtual, kaq i madh në numër, sa duket e çuditshme që ka ende dikush që se kanë vënë re. Dhe pse suksesi i social networke-ve ia ka lehtësuar punën, revolucioni virtual i tironsve autoktonë ka mbi një dekadë që ka nisur. Në forume shqiptare, shpesh mes halleve politike e ekonomike të një vendi që s’po zë paqe, anëtarë të ndryshëm hodhën me kuriozitetet e tyre, hapat e para të këtij revolucioni. Herë një fotografi, herë një frazë në dialekt, herë një histori, mjaftoi për të krijuar grupet e para virtuale të një qyteti që kish nevojë për njerëzit e tij. “Do shkoj bari n’rronjë”, qe përgjigjja kur askush nuk na kuptoi të folmen, “zatën komunistët nuk ju lejun të na nigjoni”. Analfabet jo pak herë na quajtën, pa ditë se shumë prej nesh shkruanin brenda mureve të një Universiteti Evropian e dëshira për të folur në dialekt qe kërkesa jonë për të shkruajtur historinë e një qyteti që ulëriste: “Do shkoj bari n’rronjë”! Po me këtë shprehje, iu përgjigjëm dhe atyre “zavallëve” që nuk donin histori e me grushtin në ballë e në gjoks na tregonin qytetarinë. Forumet e faqet virtuale u mbushën me imazhe fotografish shekullore, ku qytetit tonë nuk i mungonte asgjë, as rrugë të shtruara, as pemë të mbjella, as shkollat, bibliotekat, shtëpitë botuese e shtypshkronjat, as xhamia e kisha, e as arkitektura moderne, e një qyteti evropian.

“Venaliu Tirona” prezantoi Tiranën e një shekulli më parë, krenaria e çdo shqiptari, kryeqyteti i një shteti të ri, frymëzimi patriotik që nuk pushoi së shkruari; “Do shkoj bari n’rronjë”! Figura patriotësh tironas u bënë idhujt tanë, shoqëri patriotike me idealet e tyre rifituan njohjen, shkrimtarë, poetë e artistë frymëzuan revolucionin e Tironës.

“Do shkoj bari n’rronjë”, evokoi “Ahengu tirons” me këngët e vjetra popullore tironse, pasuri kombëtare e një populli, që pa to nuk gëzohet dot. Halli, gëzimi, jeta, historia e dashuria, shprehur në nota muzike i dha formën humane këtij revolucioni virtual. Muzika përcolli e përcjell çdo ditë, relike këngësh të ndaluara, këngëtarë të harruar nga historia e politizuar e muzikës. Mijëra e mijëra janë utentët virtualë që i ndjekin, shumë prej tyre jo vendali autoktonë, por që bashkë me ne mësuan të na respektojnë historinë, njohurinë, dashurinë për qytetin tonë.

“Do shkoj bari n’rronjë”, qe pena frymëzuese e faqes “tironc kam le e tironc do vdes”, ku me bejte e poezi shkroi mbi të bardhë hallet e këtij qyteti, problemet e çdo banori vendali. Në këtë forum, me fotografi e vargje, opinionet e tironsve u bënë zemra e këtij revolucioni, e si në një sofër me miq shumë nuk harrohet kurrë pa përshëndet vendin në krye të qoshes, Tironën.

“Do shkoj bari n’rronjë”, qe mendimi i krijuesve qysh më 1998, i websitit “Sk-Tirona”. Nis fillimisht nga dashuria për skuadrën e zemrës, shumë shpejt u shndërrua në një gazetë të vërtetë lajmesh mbi qytetin, histori e diskutime që ia lehtësuan punën çdo anëtari të mëvonshëm të këtij revolucioni. Sot, me një aktivitet të ndarë në grupe pune, tifozëri e informacione, SK Tirona mbledh pranë saj në çdo fundjavë dhjetëra e qindra aktivistë, që pas shallit bardhë e blu nuk harrojnë të shkruajnë “Një skuadër, një qytet, një kryeqytet, një ekip, një histori, një dashuri: Tirona”.

Bari lëshoi rrënjë, rrënjët zgjeruan shtratin, shtrati lartësoi filizat e filizat mësuan të dashurojnë fjalët; “Do shkoj bari n’rronjë”. Embrionet më të freskëta të revolucionit virtual tirons janë “Çunat e gocat e Tironës”,një urëlidhje e të djeshmes me të sotmen.

“Do shkoj bari n’rronjë”, thërrasin njëzëri forumet “Venaliu Tirona”, “Aheng Tironas”, “tironc kam le e tironc do vdes”, “SK Tirona”, “Çunat e gocat e Tironës”, “Tirona Fanatics”, “Bejtja Tironase” etj., duke kërkuar:

“Të shkruhet historia”; “Të krijohet muzeu”; “Të nderohen patriotët, shkrimtarët, artistët tanë”; Të restaurohen shtëpitë “Monument kulture”; Të ruhen kalatë e objektet historike të qytetit tonë.

“Do shkoj bari n’rronjë”, mendoi në ditën 16 Muharrem të vitit 1022 (v.1614 në kalendarin e krishterë) trashëgimtari i një prej dyerve më të mëdha të Arbërisë, Sulejman Pashë Bargjini, gjatë rrugëkthimit në atdhe. Dëshira e tij i ktheu jetën rrënjës e i dhuroi filizave të barit vendndodhjen e sotme të këtij qyteti. Ky qytet është sot thembra e Akilit, e këtij revolucioni. Sulejman Pashë Bargjini fshehur pas një busti hijezi me një emër të panjohur sheh nga lart e thotë: Vallë ky është vendi im?

E shprehja “Do shkoj bari n’rronjë”, pa i dhënë përgjigje krijuesit të tij nuk do gjej kurrë paqe.

Voskopoja u ndërtua nga vllehët, Korça vepër e myslimanëve

20/10/2013 Lini një koment

Vepror HASANI

 

VOSKOPOJA U NDËRTUA NGA VLLEHËT, KORÇA VEPËR E MYSLIMANËVE

Xhamia e Iljaz Bej Mirahorit

Xhamia e Iljaz Bej Mirahorit

Si e plaçkitën pazarin e Korçës dhe i vunë zjarrin Kasabasë

Korçë- Që nga atëherë kanë kaluar shumë kohë por deri më tani  kjo histori ka mbetur e patreguar. Sot vjen për herë të parë. Çuditërisht as historianët nuk kanë mundur të shkruajnë qoftë edhe një fjali të vetme për ngjarjet e Korçës; madje as për djegiet, as për vrasjet, as për shkatërrimet dhe as për bombardimin e 17 shkurtit 1917, ku mbetën me dhjetra të vrarë, shumë të plagosur dhe shtëpi të tëra të rrënuara e të groposura në humnerat e hapura prej 50 bombave që u hodhën mbi Korçë njëra pas tjetrës nga 7 aeroplanë. Që të gjitha këto janë mbajtur nën një heshtje të plotë duke e shndërruar ngjarjen në një mister të frikshëm. Pse ka ndodhur kështu, arsyet edhe dihen, ne do t’i përshkruajmë gjatë rrëfimit, por ajo çfarë ka ngjarë me Korçën është vërtetë një dhimbje e madhe. Ne mund të ofrojmë vetëm një pjesë të saj; atë që ka mbetur e shkruar në kronikat e gazetës “Koha”, të drejtuar nga Mihal Grameno. Sigurisht, edhe dokumente të tjera mund të gjendeshin, por  historianët tanë, me qëllim ose jo, i kanë anashkaluar këto ngjarje që në të vërtetë s’janë gjë tjetër veçse tmerre e tragjedi mbi popullsinë myslimane të qytetit të Korçës.

Një plan i zi për Korçën

Ishte viti 1914 kur kapedani grek Varda i ndjekur nga një turmë njerëzish, me dhe pa uniforma ushtarake, (ushtarë dhe andartë) ishte nisur me tërbim drejt Korçës, ashtu siç ndodh me një bishë kur e di se kopeja ndodhet në vathë dhe nuk ka nga t’i ikë. (Kur themi Korça, e kemi fjalën për lagjet e “Kasabasë”, sepse ajo ishte dhe qyteti në atë kohë). Atij, kapedan Vardës nuk po i durohej sa të shkelte Kasabanë. Dëshironte të mbërrinte atje një orë e më parë. E kishte një plan të zi në kokën e tij dhe nuk i pritej sa ta shihte të realizuar. Do të plaçkiste një nga pazaret më të famshme të asaj kohe e do të rrëmbente prej andej gjithçka që mundej; mall, të holla, ushqime dhe veshje për ushtarët e tij, të cilët ngjasonin më së shumti me një turmë rrjepacakësh e qafëpalarësh. Pastaj do t’i vinte zjarrin gjithçkaje, që tregtarët myslimanë të linin lagjet e “Kasabasë” e të merrnin arratinë. Ushtarë dhe andartë do t’i ndiqnin nga pas dhe do t’i mbanin për një kohë të gjatë nën breshërinë e plumbave që ata të iknin sa më larg që të ishte e mundur dhe mundësisht të mos ktheheshin më kurrë në atë qytet, (në Kasaba), të cilën myslimanët e kishin ndërtuar vetë me duart e tyre. Që nga dita e themelimit të qytetit, (1484-86), kishin kaluar më shumë se 400 vjet, dhe ata deri atë ditë kishin jetuar gjithnjë në paqe, por ja që kapedan Varda ishte nisur nga Greqia e po vinte drejt Kasabasë që të përzinte banorët e saj, sepse ai nuk e donte atë qytet të ndërtuar nga myslimanët. Ai do t’i përzinte përjetësisht që prej aty, vetëm e vetëm që të kishte mundësi të shkruante një histori tjetër për këtë qytet, lavdia e të cilit kishte shkuar shumë larg. E kishte marrë përsipër mjerani  këtë aventurë, sepse as që e kishte menduar ndonjëherë se nga këto troje do të kthehej në shtëpinë e tij veçse i vdekur…

Ai kishte mbërritur…

Po , më në fund kapedani Varda kishte mbërritur. Askush nuk kishte patur dijeni mbi mundësinë e ardhjes së tij. Gjithçka kishte qenë e papritur. Kështu ishte parashikuar edhe në planin e tij të zi. Të gjitha veprimet duhej të ishin të befasishme, sepse në të kundërt njerëzit mund të largoheshin dhe ai nuk do të kishte mundësi të vriste e të priste. Plaçkitja e pazarit  do të ndodhte brenda një kohe jo fort të shkurtër. Nga ana e Vardës sapo ishte dhënë urdhëri i bastisjes. Ushtarët dhe andartët nisën të hynin në dyqane, kafene, hane e tavëhane dhe nxirrnin zvarrë që andej pronarët e lokaleve. Pastaj filluan të rrëmbenin gjithçka që mund të rrëmbehej; veshje, ushqime, cigare, pije… Frangat e arit i takonin vetëm kapedan Vardës. Dyqanet po boshatiseshin dhe rrugët po mbusheshin me mallra të hedhura andej-këndej. Gjithkush synonte që fillimisht të merrte ato që kishin më shumë vlerë e më pas të tjerat. Ishte një rrëmujë që dukej sikur nuk do të përfundonte kurrë. Shtyheshin, vraponin, iknin, ktheshin dhe zhvatja përsëri nuk kishte të përfunduar. Pazari i Korçës kishte një shtrirje kaq të madhe sa të dukej sikur nuk kishte as fillim dhe as fund. Edhe magazinat po plaçkiteshin njëra pas tjetrës. Ajo që po ndodhte me Korçën ishte një tmerr i vërtetë që nuk do të harrohej kurrë.

Edhe grekomanët…

Nuk vonoi shumë dhe turmës së ushtarëve dhe andartëve të kapedan Vardës iu bashkuan edhe ata, ca grekomanë që banonin në lagjet e “Varoshit”. Edhe atyre më në fund po u ndriste fati. Tashmë edhe ata mund të vidhnin, të rrëmbenin dhe të plaçkisnin ashtu siç po bënin “trimat” e Vardës. Dhe kur në të gjitha dyqanet nuk  kishte mbetur qoftë edhe një kuti shkrepse pa u grabitur, atëherë dikush prej tyre u kujtua dhe u tha andartëve se atje në periferi të qytetit gjendeshin kopetë e bagëtive, lopët dhe delet e myslimanëve. Askush prej tyre nuk u mendua dy herë, nuk pati asnjë çast hezitimi, që të gjithë u nisën andej nga i udhëhiqte udhërrëfyesi. Myslimanët çuditërisht nuk po bëheshin të gjallë. Disa thanë se tashmë ata kishin ikur nga Kasabaja; të tjerë pohohuan se i kishin parë të fshiheshin nëpër bodrumet e shtëpive, ashtu sikurse pati edhe nga ata që thanë se Varda i kishte shkuar që të gjithë në thikë e s’kishte mbetur askush i gjallë, por në të vërtetë asgjë nuk dihej me siguri. Tmerri ishte i madh. Që nga ardhja e kapedan Vardës breshëria e plumbave nuk pati të pushuar për asnjë çast. Përderisa ata ishin nisur të grabisnin mallin dhe gjënë e myslimanëve dhe myslimanët nuk po bëheshin të gjallë, kjo tregonte se ata ose kishin kishin ikur, ose nuk jetonin më. Bagëtitë vërtet kishin mbetur pa zot. Edhe çobenjtë kishin braktisur gjënë e gjallë dhe nuk dihej nga kishin shkuar.

Mish dhe verë…

Pas pak, gjithë hajdutëria nisi të kthehej me tufa dhensh, lopësh e dhish. Disa të tjerë po vinin kapardisur mbi kuaj, duke u tundur dhe shkundur si arkondë të vërtetë. Atë natë u therën shumë bagëti dhe u festua deri në të gdhirë.  Mishi dhe vera nuk kishin te sosur.  Të dehurit u përhapën si fantazma në të gjitha rrugët e qytetit. Ahengu i ushtarëve të Vardës do të përfundonte vetëm në të gdhirë. “Varda me andartët, katilët e tij, bëri të njëmijë e një qindat, e zhveshi dhe e prishi megjithsej Korçën dhe rrethinat e saj”, shkruante gazeta “Koha”. Vjedhja vazhdoi edhe ditën e nesërme. Ushtarë, andartë e grekomanë do të përhapeshin nëpër të gjitha çifligjet që ishin pronë e bejlerëve të Kasabasë, sepse gjithnjë gjendet diçka për të rrëmbyer në pronën e tjetrit. Disa prej rrëmbyesve shpresonin që ato çifligje ose të bëheshin prona të tyre, ose të merreshin me ndonjë farëlloj qiraje sa për t’u zënë në gojë, sepse kthimi i myslimanve në Kasaba as kishte për të ndodhur ndonjëherë dhe as nuk mund të mendohej. Madje që të nesërmen nisën të vinin në punë njerëzit e varfër dhe tu qëndronin te koka, si për tu tregur atyre se tani e tutje do të ishin ata zotët e këtij vendi. Më pas nuk lanë pa vjedhur e prishur xhami e teqe. Shpresonin shumë që tek tyrbja, atje ku gjendej varri i themeluesit të qytetit, Iljaz bej Mirahorit dhe i njerëzve të tij do të gjenin të fshehur edhe ndonjë thesar, megjithatë vodhën gjithçka gjeten dhe prishën gjithçka mundën. Askush prej asaj turme nuk ndjente të ngopur me vjedhje e grabitje.

Por… çfarë kishte ndodhur vallë me myslimanët?

Banorët e Kasabasë

Tregtarët myslimanë me të braktisur dyqanet e pazarit kishin nxituar drejt banesave me qëllim që të merrnin familjet e tyre dhe të iknin sa më larg Ksabasë, por nuk kishin mundur.  Pikërisht në këtë kohë, në dyert e shtëpive të tyre kishin mbërritur ushtarët dhe andartët. Që nga ai çast  edhe brenda banesave nisën të dëgjoheshin të shtëna armësh, ulërima grash, të qara fëmijësh dhe rrënkime pleqësh… Kishte qenë një kacafytje e përgjakshme mes banorëve të Kasabasë dhe kapedanëve të kapedan Vardës.  Po ndodhnin gjëra që nuk mund të tregohen… Të gjithë donin të iknin…  Dhe ata që mundën ikën… Mbetën aty vetëm pleqtë që nuk ecnin dot, ata që ishin të sëmurë dhe lëngonin në shtrat, por edhe ata që preferuan të vdisnin në shtëpitë e tyre… Megjithatë, që të gjithë vajtonin; edhe ata që kishin marrë arratinë, edhe ata që nuk mundën të iknin dot. Ata që ikën e kishin mendjen te prindërit që s’mundën t’i merrnin dot me vete, por edhe dhe të moshuarit lotonin që ishin ndarë nga fëmijët. Asnjëri prej tyre nuk e dinte si do t’i vinte halli tjetrit… Kishin katërqind vjet që jetonin në ato banesa dhe nuk u kishte ndodhur kështu kurrë më parë. Kishin investuar gjithë jetën e tyre, brez pas brezi, dhe ia kishin dalë mbanë të ndërtonin një qytet të madh dhe të bukur, ashtu siç e kishte ideuar vetë themeluesi i Korçës, Iljaz bej Mirahori. Ishte hera e parë që po e braktisnin atë vend dhe sikur të mos mjaftonte e gjitha kjo, në ikje e sipër, do të shikonin se Kasabasë i ishte vënë flaka; po digjej gjithçka e po shndërrohej në hi. Një tmerr të tillë nuk e kishin menduar kurrë…

Korça vepër e myslimanëve

Po iknin nga ai qytet që ishte bërë realitet fal mundit dhe sakrificës së myslimaneve. Po linin pas pazarin; mall, pasuri e gjithë ç’kishin patur. Vallë a do ta gjenin më këtë qytet nëse një ditë do të ktheheshin përsëri aty? Fama e pazarit kishte shkuar shumë larg, e bashkë me famën e tij  po kaq larg kishte shkuar edhe emri i banorëve të tij. Për atë qytet ata do të kishin gjithnjë mall dhe dhimbje. Ishte një qytet që gjithnjë e më shumë po tërhiqte jo vetëm vëmendjen e tregtarve, por edhe të udhëtarve, të historianëve, të studiuesve e të njerëzve të artit. Kasabaja për të gjithë mbetej një krijesë sa e këndshme aq dhe e mrekullueshme. Veç kësaj, çdonjërin që jetonte në ato anë e bënte të ndihej krenar. Madje mund t’u duket e pabesueshme, por vetë me dëshirët e tyre, disa të krishterë morën iniciativën për ta shndërruar portretin e Kasabasë në një imazh të pavdekshëm. Në vitin 1767 ata e gdhëndën pamjen e saj në një gravurë. Fati e deshi të ndodhte kështu, që askush të mos e zhdukte dot imazhin e saj, qoftë edhe duke e djegur, prishur dhe shkatërruar. Kishte qenë e shkruar që ajo të ringjallej sërish nga hiri për të qenë përjetësisht aty. Kjo gravurë e vitit 1767 u skicua në Vjenë prej voskopojarit Theodhor Sina Grundo, nën përkujdesjen e murgut të shenjtë Parthen të manastirit të Shën Prodhromit Voskopojë, me shpenzime të tregtarit gjithashtu voskopojar të asaj kohe, zotit Andrea Tirka. Gravura e Korçës është një pjesë mikroskopike e një gravure komplekse të madhe ku përveç pamjes së Voskopojës, Shipskës etj, jepet edhe pamja e qytetit të Korçës. Në këtë gravurë dallohet lumi, xhamia dhe disa shtëpi të qytetit (që nuk është gjë tjetër veçse Kasabaja), si dhe një pyll me pisha në pjesën jugore, matanë lumit të Moravës.(shpjegimet janë të studiuesit Ilia ballaurit)  Skalitja e pamjes së Kasabasë është një falenderim për vllehët e Voskopojës

Asgjë e çuditshme

Ndoshta dikujt mund t’i duket e çuditshme pse Kasabaja u skicua nga Voskopojarët, madje dhe me shpenzimet e tyre, por në të vërtetë këtu nuk ka asgjë të çuditshme. Me Voskopojarët, banorët e Kasabasë kishin patur gjithnjë marrëdhënie e fqinjësi të mirë dhe gjithnjë i kishin ofruar ndihmë njëri-tjetrit. Mjeshtrit e Kasabasë u kishin mësuar zanatet voskopojarëve. Këtë të vërtetë e sjell edhe Pirro Thomo në librin e tij “Korça, urbanistika dhe arkitektura” ku konkretisht  shkruan: “Nga dokumentet e vitit 1762 mësojmë se banorët e Voskopojës kanë shkuar te mjeshtrit e kazasë së Korçës, kanë punuar dhe mësuar zejet e rrobaqepësisë, këpucarisë dhe të farkëtarisë”, pra, shpjegon Thomo, “duket qartë se në atë kohë zejet në këtë qytet ishin në lulëzim, përderisa banorët e Voskopojës, e cila kishte arritur një nivel të lartë si qendër e rëndësishme tregtare e kulturore, vinin këtu dhe mësonin zanat”. Edhe sahatin  e Kasabasë që ngrihej në oborrin e Xhamisë së Madhe e kishin  ngritur bashkë me voskopojarët. Investimet u kryen nga rufeti i bakejve myslimanë në bashkëpunim vllazëror me zejtaro-tregtarët e Voskopojës. Në vitin 1784 sahati zbukuroi gjithë qytetin, pasi u vendos në një kullë të lartë nga ku mund të shihej prej të gjithëve. Sigurisht Voskopoja ishte ndërtuar nga vllehët, ndërsa Korça ishte vepër e myslimanëve. Kjo ishte dhe arsyeja që i lidhi kaq fort njëri me tjetrin, si ndërtues të dy qyteteve të famshme.

Braktisja e Kasabasë

Kishin jetuar për 400 vjet me radhë në qytetin e tyre në Kasaba, por tashmë e kishin braktisur atë. Kishin marrë udhët dhe ishin ndalur fshatrave të largët, atje ku kishin patur të afërm apo të njohur. Ende kishin shpresa se një ditë gjendja do të qetësohej, dhe ata do të riktheheshin në shtëpitë e tyre, por lajmet që përhapeshin ishin dëshpëruese dhe të frikshme. Greqia kishte sjellë në Korçë njerëz të tjerë; ishin përzgjedhur gjithë kriminelët e Greqisë, ata që ishin të aftë t’i bënin të gjitha. Gjithçka ishte e qartë: nuk do të lejohej më kthmi i myslimanëve në Kasaba. Gazeta “Koha” shkruante: “Këtu në Korçë, siç flitet, u pikas që u fillua një komitet grek, i cili do të ketë detyrë që të trembë e të vrasë çdo njeri që i kundërshtohet propagandës greke. Ky komitet grek në Korçë u formua prej 8 vetësh dhe Kondulit, (kapedanit grek, i cili erdhi pas kapedan Vardës, shënimi ynë), i ardhi urdhëri që ta njohë e ta mpronjë me çdo therori komitetin grek, që komiteti t’i ketë duart e zgjidhura për të bërë si të dojë”. “Kanë sjellë edhe katilët e Gjiritit për të vrarë ata njerëz që nuk u pëlqejnë atyre, shkruante më tej gazeta.  Me që në ky komitet ndodhen edhe ca Korçarë, të cilëve s’u dhimbet aspak për Korçën, është frika se mos na futin në një vëllavrasje. Me një fjalë, siguri këtu në Korçë nuk ka, dhe ne s’dimë se qysh do të jetë fundi ynë, po punët s’na duken fare të mbara…”. (Gazeta koha 1 prill 1915) Të gjitha këto lajme që dukeshin sikur dilnin prej ferrit i dëshpëronin edhe më shumë myslimanët e ikur. Vallë a do të kishte një ditë të bardhë edhe për ta. Asgjë nuk dihej, përveç shpresës që vdes e fundit…

Vrasjet prapa shpine

Fill pas krijimit të komitetit grek nisën të përhapen edhe lajmet e vrasjeve. Njerëzit vriteshin prapa shpine. Autorët kryenin vrasjet dhe largoheshin nga vendi i krimit duke menduar për krimin tjetër që do të kryhenin në një nga ditët që do të vinte. Në shenjestër ishin vënë myslimanët. “Përpara ca kohësh vranë dy bejlerë të Pojanit afër fshatit, shkruante gazeta e cituar më sipër, tani më së fundi vranë tre myslimanë nga fusha, dhe as u kërkuan, as u muar vesh se kush i bëri këto vrasje” “Përveç qeverisë ushtarake, të cilën e drejton kolonel Konduli dhe një policie me ca xhandarë, qeveri ose gjykatore nuk ka në Korçë; as nëpunës s’janë vënë, dhe asnjë e drejtë nuk shikohet”. (Gazeta koha 1 prill 1915) Myslimanët ndiqeshin kudo që të ishin. “Tashti ka dërguar qeveria ca oficerë- katilë të cilët kanë zënë e po bastisin fshatrat myslimane. I mundojnë të gjorët fshatarë duke u vënë hekur të nxehtë nëpër gishtrinj, duke u futur spica nëpër thonjë, duke u hedhur vaj të djegur në kraharor, duke i shtrënguar që të japin çfarëdo arme që kanë dhe duke u rrëmbyer sa mund para më tepër. Të gjorat fshatra myslimane nuk u janë mbarur akoma taksiratat, s’është mjaft që u prishën megjithsej po edhe po i pjekin të gjallë!!! Gazeta koha 21 tetor 1915). Njerëzit, shkruante gazeta, duke parë këto klika me anën e një komiteti katil-gjiritas që është në Korçë ka shtënë tmerrë duke vrarë gjindjen e duke rrjepur edhe lëkurën e trupit të gjindjes”. Veç sa më sipër, tashmë grekomanët kishin edhe dy gazeta në dispozicion për ta përhapur propagandën gjithandej. Fat i mirë ishte që njerëzit e propagandës greke kishin gjithnjë përçarjen mes tyre. “Duke parë që gazetën “Pellazgu” të qelbësirës Skënder nuk e zinin me dorë, veçse (me nder) në të ligë, zunë të nxjerrin një tjetër lëvere më të qelbur “Korica” prej Arqimidh Vangjelit, i dhëndri i qir Vasillaq Singjellit, se arriti kafsha, (është fjala për Arqimidhin), ta urdhërojë gruaja…!” ( 24 june 1915 ).

Asnjë lajm i mirë

Ditët kalonin njëra pas tjetrës dhe banorët e Kasabasë çdo ditë pyesnin mes dhimbjes dhe lotëve; mos vallë grekët kishin ikur nga Kasabaja dhe pazari kishte mbetur i lirë, por nga ato që dëgjonin nuk kishte asnjë lajm të mirë. Grekët nuk kishin ikur dhe në Pazar nuk shkonte askush, sepse tmerri dhe frika ishin përhapur gjithandej. Thuhej se në Korçë mund të yje i gjallë, por për të dalë që andej, veçse i vdekur.  Ja si e përshkruante gjendjen e pazarit, gazeta e përmendur më sipër: “Tregtia në Korçë është shumë e pakët, pazari nuk luan fare, tërë tregtarët dhe ditën e së shtunës rrinë me duart kryq dhe po hanë para të azërta, me që myslimanët u prishën fare, dhe me që të holla prej Amerike vijnë fort të pakta, tregtia sot e Korçës po qan, dhe çarshia po gjendet në hall të madh. Po edhe ata bukuroshë korçarë që rrëmbyen këtë behar sa plasën, rrinë dhe po u sosen të hollat dhe po mendohen se s’kanë nga ta zënë, dhe nuk gjejnë më të rrëmbejnë se u mësuan liksht pa punë. Pandehin se po ta zaptojë përsëri Greqia Korçën do të derdhë thasët me flori…” “Një shtrenjtësi e madhe që nuk tregohet, vetëm mishi shitet lirë sepse kasapët kanë edhe lopë edhe dhen të rrëmbyera. (Gazeta “Koha”8 prill 1915) Duhet të shkruaj një kalema të gjatë por të vërtetë për të treguar gjithë të këqijat që po heqim nga vëllezërit grekë nga katilët e mëdhenj të botës që nuk kanë shembull në historitë e përbotshme. Edhe për të vënë në veprim gjithë poshtërsitë kanë ndihmës klikën e poshtër dhe të fëlliqur tradhëtare, të cilët së bashku rrjepin popullin e fakir-fukaranë. Këta të poshtër kanë marrë me qira çifligjet e bejlerëve dhe me ndihmën e qeverisë janë bërë më keq se Ismail Durdushi, vrasin dhe presin më të katër anët, kanë nga tre palë kuaj dhe nuk dinë qysh të mundojnë çifçinjtë  (bujqit) për të marë më shumë bereqet. Çifçinjtë muhamedanë, por më shumë të krishterët, janë kaq të  dëshpëruar dhe të inatosur kundra këtyre bejlerëve kaurë sa s’është çudi që t’i goditin dhe t’i vrasin se i kuptuan zuzarët që gjer dije u thërritnin dhe i ndërsenin duke thënë: “O burrani, bjeruni turqve dhe u merrni çifligjet,” dhe sot i shikon allabraca me ca belurçina të qelbura të bredhin në sokakët e Korçës bashkë; kanë dhe zuzarë (14 tetor 1915)

E vërteta e planeve të grekut

U deshën të kalonin disa muaj nga dita e shkatërrimit të Kasabasë që njerëzit të fillonin të kuptonin se çfarë kishte ndodhur realisht me qytetin e tyre. Pasiguria rritej vazhdimisht dhe çdo ditë mbërthente me hijet e frikës edhe shpirtrat e banorëve që vinin të tregtonin te pazari. Gjithçka  mund të ndodhte në ato ditë të vështira. Tmerri po bëhej edhe më i madh, kurse varfëria po trokiste në dyert e të gjithëve. Komiteti grek i kishte duart të lira të bënte sit ë donte. Rrugët e Kasabasë kishin mbetur të shkreta, ku herë pas herë shfaqeshin vetëm disa pleq të drobituar që i kishin shpëtuar plumbit dhe zjarrit. Gjithë pamja i ngjasonte një vajtimi therës. Ngado kishte vetëm mure pa dyer dhe dritare dhe hi. Tashmë gjithkush po kuptonte se si u gjendën kaq papritur në këtë situatë kaq të vështirë. Qëllimet e grekut nuk paskëshin qenë aspak të mira për askënd. Gazeta “Koha” shkruante: “Tani e kuptuan bukur cili ishte greku; ata që betoheshin “ja vdekje, ja bashkim”, mallkojnë sahatin e lig kur shkeli këmba e grekut këtu, sepse po e shohin që planet që kishin grekët për ta djegur Korçën, ta bënin hi, jo vetëm që i përmbushën, por përkunrdazi i kapërcyen një qind herë më shumë”. Dhe pas këtij përshkrimi të shkurtër, korrespondenti i gazetës “Koha” në një gjendje tejet dëshpëruese, vazhdonte të pohonte:  “Një qind herë më mirë ta kishin djegur se sa e lanë në mure vetëm, dhe me njerëz që s’u ka mbetur as frymë as shpirt! (12 gusht 1915). Megjithatë tashmë grekët kishin disa ditë që kishin ikur dhe myslimanët nisën të ktheheshin në shtëpitë e tyre. Shpresonin se një tragjedi e tillë nuk kishte për t’u ndodhur më.

Rikthehet ushtria greke

Asgjë nuk do të rezultonte e vërtetë nga ajo që kishin shpresuar myslimanët. Kur kishin kaluar vetëm disa muaj dhe banorëve të Kasabasë ende nuk u ishin mbyllur plagët, ushtria greke u rikthye sërish. Ishte mëngjes kur ata mbërritën në Korçë. “Në një heshtje të plotë ku mbizotëronte qetësia, nisën zërat: Zito! Zito! Zito!… Buçiste qyteti, shkruan gazeta “Koha” kur shikojmë një tokicë njerëz, kapardisur me hutat ndë dorë sikur kishin marrë kokën e krajlit, duke kënduar greqisht u përhapën ndë qytet posi të marrosur. Këta ishin andartët, mohonjësit e shtëpive të tyre. Pas këtyre erdhi një tabor me ushtarë të rregulleshëm, të cilët u përndanë në mëhallat e myslimanëve për të mbrojtur nderin e tyre gjoja. Vinin me një mendje që Korça lule i hodhi zinxhirët e Rrobërisë. Vizitorët bukuroshë, si panë dritën e shkëlqimit të qytetit, ngulë këmbë e nisën të kapardisen; një javë s’lanë gjë pa bërë: çnderuan, prenë, vodhën e prishën xhami e teqe dhe më pas vunë minaret në nishan dyfeku, këta që mos u mbiftë fara! S’guxonte të dalë hoxha në minaret nga plumbat që dërgoheshin. Pa shikoni sa bukur dhe sa mirë i do muhamedanët qeveria greke; si prushin në gji… Ti lëmë fjalët, u suall aq mire, aq të qytetëruar, sa më s’ka ku të vejë. Kështu që vizitorët liridashës shumë nga gratë myslimane u zbulonin suratin! Pasandaj si mund të na ngrohet ky barbar! Kur pas ca kohë, kur dëgjojmë tellallin që thërret dhe thotë, sot do të ngrihet flamuri ynë, të vijnë të gjithë qytetarët! U çudita, shkruan korrespodenti i gazetës “Koha”. Cili flamur do të ishte ay!… Të gjithë ishin mbledhur përpara shtëpisë të Ali Qytezës dhe kur shoh të ngrihet flamuri grek ndë një cep të shtëpisë, ndë atë vend që ka qenë djepi i Lëvizjes Kombëtare. E mjera Korçë!… Pati fatin e zi dhe me ndihmë të saj (të grekomanëve) të arrijë këtë ditë kaq të mërzitur. Gjithë ajo shumicë njerzish e farmakosur me ndjenja mosnjerëzore i shikoj të mblidhen përpara Mitropolisë, që prej asaj delnin farmaqet të gatitura për atë popull, që ta farmakosë”. Ishte viti 1915.  Për Kasabanë tmerret dhe dhimbjet nuk do të kishin të sosur. E gjitha kjo është vetëm një pjesë e vogël e rrëfimit e asaj cfarë kemi gjetur te koronikat e gazetës “Koha”.

Epilogu

Po , kjo është vetëm një pjesë e asaj çfarë ka ndodhur me Kasabanë, që në atë kohë ishte edhe qyteti. Dikush mund të pyesë: po në anën tjetër të lumit cilat lagje shtriheshin?  Ekzistojnë dëshmi të shumta, por mes tyre ka mbetur edhe një dëshmitë mjaft e rallë. Një i moshuar pati rastin t’i tregojë në vitin 1917 botuesit të gazetës “Adriatiku” se si kishte qenë Korça në vitet 1850-60, kohë të cilën ai e kishte jetuar. Me qenë se për Kasabanë dhe pazarin e saj në këtë shkrim kemi folur gjatë, po i referohemi dëshmisë të të moshuarit vetëm për lagjet që ishin në anën tjetër të lumit, (kur lumi ekzistonte). Sipas të moshuarit, “Bulevardi “Shën Gjergji”, (në vitet 1860) ishte një përrua i thellë, që atje kullonin ujërat dhe si zbriste afër kazinos, (kazinoja u ndertua pas viteve 1900, shënimi ynë), merrte më të mëngjër e derdhej në lumë. Që nga shtëpia e Cales dhe gjer në “Shën Gjergji” ishin bostane. Gjeni mëhalla që quhet, ishin ara, ashtu sikurse edhe Barç mëhalla. Kisha e “Shën Gjergjit” ishte një kishë e vogël fort edhe në hapësirë, sikurse janë kishat e katundeve. Ku qendron kazinoja sot, ishte poçaranë dhe më tej s’kishte as farë magazie.  Pazari dhe tregtia bëheshin në çarshi të vjetër, (pra në Kasaba, shënimi ynë) që quhej mëhalla nga pazari i peshkut dhe rrotull”. ( Gazeta “Adriatiku”, 9 shkurt 1917).  E pra, qyteti i Korçës ishte Kasabaja, dhe meqenëse ishte ndërtuar nga myslimanët, grekët do ta kishin hal në sy, sepse dëshironin që Korçës t’i jepnin një histori tjetër. Megjithatë ajo rilindi sërish nga hiri për të qenë përjetësisht aty… si një vepër e mrekullueshme e myslimanëve.

Burimi: http://www.standard.al/voskopoja-u-ndertua-nga-vllehet-korca-veper-e-myslimaneve/

Hafiz Ibrahim Pallaska (1875-1935)

21/05/2013 2 komente

Mexhid YVEJSI

 

HAFIZ IBRAHIM PALLASKA (1875-1935)

Hafiz Ibrahim Pallaska

Hafiz Ibrahim Pallaska

Hafiz Ibrahim Pallaska, është djali i Osman ef. Pallaskës, lindi në vitin 1875, në mëhallën e Sefës, që ndodhët pranë Çarshisë së Vogël në Gjakovë. Qysh i vogël, ende fëmi, dallohej për zgjuartësi. Kjo zgjuartësi është dëshmuar, kjo dëshmi të gjithë i ka befasuar të gjithë i ka gëzuar kur në moshën shtatë vjeçare tërë Kur’anin përmendësh e ka mësuar! Ky është një rast i rrallë, jo vetëm në trojet shqiptare, por edhe në përmasa ndërkombëtare.

Shkollimi dhe shërbimi

Pasi e mësoi Kur’anin përmendësh në mejtepin e “Halil Efendisë” në Gjakovë, pastaj vazhdoi shkollimin në Medresenë e Vogël, në Medresenë Madhe në Gjakovë, kurse studimet e larta për drejtësi (sheri’at) i filloi në Kairo, i vazhdoi në Damask, i përfundoi në Stamboll.

Gjatë shkollimit, arriti të mësoi për bukuri gjuhët orientale osmanishtën, arabishten e persishten. Pas diplomimit, u kthye në vendlindje në Gjakovë, ku shërbeu me përkushtim, me drejtësi, si imam, mësues, predikues, kadi dhe myfti. Myfti ishte deri në vitin 1929.

Përveç që ishte besimtar, Hafiz Ibrahim Pallaska ishte atdhetar, atdhetar i kishte e miqët më të ngusht, ndër ta dallohej atdhetari i njohur, Mulla Haxhi Zeka (1832-1902) me të cilin kishin shkuar në vendet e shenjta, në haxh, në Mekke dhe Medine të Hixhazit, sot Arabia Saudite. Udhëtimin deri në vendet e shenjta e kishin bërë në këmbë, shkuarje-ardhje, që ka zgjatur rreth dhjetë muaj!

Ka shërbye si imam në Xhaminë e Mahmud Pashësh në Çarshinë e Vogël dhe në Xhaminë e Sefës, që e kishte afër shtëpisë. Përveç detyrës së imamit në xhami, që nga viti 1907, kur ende ishte Perandoria Osmane në trojet tona, Hafiz Ibrahim Pallaska ka qenë Kadi i Gjakovës, kurse më vonë deri në vitin 1929 ishte Myfti i Gjakovës.

Ndërroi jetë në Gjakovë në vitin 1935, kur ishte në moshën 60 vjeçare. La në shtëpi ku banonte një bibliotekë të pasur me libra në gjuhët orientale, me përmbajtje fetare, historike, filozofike, mistike, kishte fjalor, enciklopedi, drejtësi, gjuhësi, udhëpërshkrime, letërsi, në gjuhën osmane, arabe dhe perse, të cilat, djali i tij, dr. Talat Pallaska ia dhuroi Bibliotekës Kombëtare të Kosovës në Prishtinë, të cilat ruhen në një vend të veçantë…

Hafiz Ibrahim Pallaska ka lënë dy djem, Shaniu, aktor dhe dr.Talatin.

Shani Pallaska (1928-1999) është djali i Hafiz Ibrahim Pallaskës, që ishte aktor i teatrit, filmit televiziv, dhe ekranit të madh. Shani Pallaska u lind në Gjakovë 1928, por artin e tij e përkreu në Teatrin Krahinor të Prishtinës (TKP) dhe në studion filmike Kosovafilmi. Bashkë me aktorët Abdurrahman Shala, Istref Begolli dhe Muharrem Qena, Shani Pallaska ishte pionier i aktrimit kosovar. Pas suksesit në Kosovë, Shaniu morri pjesë edhe në projekte filmike në pjesë tjera të ish-Jugosllavisë. Ndrroi jetë në Prishtinë më 13 janar 1999.

Dr. Talat Pallaska, (1930- 2011) është djali i Hafiz Ibrahim Pallaskës. Dr. Talat Pallaska ka qenë mjek i specializuar për sëmundjet e veshëve, hundës dhe fytit, (otorinolaringolog), profesor i Univerzitetit të Prishtinës, ishte kryetar i Shoqatës së Mjekëve të Kosovës. Kryetar i Shoqatës së arsimtarve universitar të ish Jugosllavisë. Ishte anëtar i këshillit redaktues të revistës shkencore “Sinopsia ORL Yugoslavica” dhe një nga mjekët më të shquar që kontribuoj në organizimin e revistës “Praxis medica”, anëtar i Këshillit redaktues i së cilës ishte një kohë.

Dr. Talat Pallaska ishte nxitës dhe aktivist i hapjes së Fakultetit të Mjekësisë në Prishtinë, i cili filloi punën në vitin 1969. Në Fakultet të Mjekësisë u zgjodh ligjerues më 1972. Pas dy vite më 1974, morri titullin “Docent” në lëndën e otorinolaringologjisë, pas katër viteve u zgjodh “Profesor inordinar”. Ishte Prodekan i Fakultetit të Mjekësisë në Prishtinë gjatë viteve 1972 -1974, ndërsa në vitin shkollor 1979 – 1981ushtroi detyrën e Dekanit të Fakultetit të Mjekësisë në Prishtinë. Shumë kohë ishte drejtor i Klinikës së Otorinolaringologjisë dhe udhëheqës i katedrës së ORL-së.

Me ardhjen e masave të dhunshme serbe në Fakultetin e Mjekësisë në vitin 1990, me që ishte nënshkrues i Apelit 215, Talat Pallaska u detyrua të jap dorheqje në postin e drejtorit të Klinikës së ORL -së në Prishtinë. Më vonë, në vitin 1991, u largua nga puna me dhunë nga okupatorët serbë, mirëpo edhe më tutje, por në kushte shumë të vështira ushtroj detyren e mësimdhënësit në Fakultetin e Mjekësisë. Në atë kohë mësimi mbahej në shtëpi private. Në Klinikë të ORL-së u kthye në qershor të vitit 1999, në detyrë të Kryeshefit të repartit operativ me njësinë intesive. Talat Pallaska u pensionua në vitin 2001. Edhe pas pensionimit vazhdoj bashkpunimin me Fakultetin e Mjekësisë në Prishtinë, deri në vitin 2003.

Dr. Talat Pallaska ndrroi jetë në Prishtinë më 25 qershor Prishtinë, u varros në Gjakovë më 26 qershor 2011 n’ora 17 në varrezat e qytetit ku lindi.

Burimi: http://www.kosovarimedia.com/index.php/bota-shpirterore/personalitete-fetare-atdhetare/17028-hafiz-ibrahim-pallaska-1875-1935.html

Ndiqe

Merreni çdo postim të ri drejt e te email-et tuaja.

Bashkojuni 68 ndjekësve të tjerë

Këtë e pëlqejnë %d bloguesa: