Kreu > Intervista me personalitete > Kreshnik Osmani: Më agresiv karshi palës maqedonase për të mbrojtur interesat kombëtare (intervistë)

Kreshnik Osmani: Më agresiv karshi palës maqedonase për të mbrojtur interesat kombëtare (intervistë)

KRESHNIK OSMANI: MË AGRESIV KARSHI PALËS MAQEDONASE PËR TË MBROJTUR INTERESAT KOMBËTARE

(intervistë)

Z.Osmani në intervistën për portalin ExPress.mk me gazetarin  Aleksandër Rrema

Z. Osmani në intervistën për portalin ExPress.mk me gazetarin Aleksandër Rrema

Kryetari i Partisë Shqiptare Atdheu me seli në Tiranë, Kreshnik Osmani në një intervistë ekskluzive për portalin ExPress.mk në optikën e një lidershipi është munduar t’a trajtojë aktualitetin politik në Shqipëri, Kosovë dhe Maqedoni, si një domosdoshmëri për një bashkim dhe bashkëpunim të frutshëm në të ardhmen.

ExPress.mk: Prej sa kohësh jeni në krye të kësaj partie, dhe çfarë keni bërë ju për të arritur këtë elektorat?

Kreshnik Osmani: Partia Shqiptare Atdheu, formacioni politik që unë drejtoj është themeluar para më shumë se 9 vitesh dhe unë jam në krye të tij që prej Marsit të vitit 2012. Gjatë kësaj kohe ne kemi arrritur t’a nxjerrim këtë formacion politik nga anonimati në një formacion politik që tashmë është prezent fuqishëm. Vendi kalon prej një kohe të gjatë sicionale dhe rraskapitëse, me gjithë skeptizicmin prezent në shoqërinë shqiptare në rritjen e numrit të partive politike. Ne mendojmë se ka vend në Shqipëri për formacione, për njerëz të cilët nuk kanë qënë të implikuar në dallaveret e politikës dhe kanë të drejtën legjitime të hedhin aksionet intelektuale dhe politike në politikën shqiptare. Jemi të vetëdijshëm për problemet dhe vështirësitë që do të hasim rrugës por jemi të bindur se ndodhemi në rrugën e duhur dhe kam përshtypjen se nuk do të jetë e largët koha kur frytet e punës tonë do të fillojnë të bëhen të dukshme dhe të prekshme për të gjithë shqiptarët.

ExPress.mk: Ju si kryetar i kësaj partie keni bërë një marrëveshje politike parazgjedhore me mazhorancën e sotme, atëherë pse nuk jeni pjesë e skemës qeverisëse?

Kreshnik Osmani: Ne e kemi studiuar aktivitetin qeverisës të qeverisë së mëparshme dhe kemi marrë një vendim politik para 13 qershorit për të qenë pjesë e koalicionit “Shqipëria Europiane”. Ky ishte një vendim që u mor duke marrë parasysh premtimet dhe angazhimin të cilin e shprehte partia alternativë e madhe “PS” për të bërë ndryshime të mëdha në Shqipëri. Nisur nga kjo dhe të diktuar nga ‘Kodi Zgjedhor’ zullumqar, i cili bie mbi qafën e partive të vogla kemi qenë të detyruar të rreshtohemi në një koalicion pasi është vetëvrasje politike në Shqipëri referuar kodit aktual zgjedhor, dalja i vetëm në zgjedhje. Pra, ne do të preferonim të dilnim të vetëm në zgjedhje por mungesa në infrastrukturën ligjore, dhe mungesa e infrastrukturës politike nuk i lejon sot partitë e vogla të dalin të vetme në zgjedhje. Ne investuam tek kampi i majtë edhe pse vetë jemi një parti e qendrës së djathtë, sepse besuam se do të kishte dhe do të ndodhnin reforma të mëdha. Nuk jemi për momentin pjesë e qeverisë për arsye se kjo është një zgjedhje e cila është e lidhur me vendimet që marrin dy partitë e mëdha. Nuk na shqetëson pjesëmarrja në qeveri dhe as nuk na shqetëson mospjesëmarrja në qeveri, pasi ne kemi kontributet tona çfarë t’i ofrojmë këtij koalicioni në rast se ata do na thërrasin. Ajo që ne preokupohemi si formacion është të ndjekim mënyrën sesi qeveriset vendi, duke ndjekur me kuriozitet dhe me vëmendjen e duhur çdo hap të qeverisë shqiptare dhe jemi aty për të luajtur rolin e gardianit të interesave të shqiptarëve të cilët nuk kanë zë. Dhe do të jemi aty në momentin që do të shikojmë se kampi i Rilindjes do të devijojë nga trajektorja për të cilën i premtoi shqiptarëve, dhe padyshim që ne do të marrim vendime të dyta politike të cilët do të jenë të lidhura me vazhdimësinë tonë në këtë koalicion.

Pra, pjesëmarrja apo mospjesëmarrja jonë në qeveri nuk është e lidhur me aspiratat tona për të qenë pranë pushtetit, por është e lidhur thjeshtë me kontributet të cilat ne mund t’i ofrojmë qeverisë.

ExPress.mk: Sa vota arritët t’i garantonit kësaj qeverie dhe pse Partia Shqiptare Atdheu vazhdon të jetë në opozitë brenda koalicionit qeverisës?

Kreshnik Osmani: Në Shqipëri ka dy lloje partish: Parti të njohura nga ligji, nga shteti, nga gjykata konform rregullave, ka dhe parti të diktuara apo të gjendura në trysninë e rrëmujhanes së madhe politike në vend, të cilat quhen “parti futja kot”. Ne jemi nga ato parti të cilët komisioneri ynë i vetëm në zgjedhjet e vitit 2013, deklaroi në zgjedhje se partia jonë ishte një parti që kur i numëroheshin votat, d.m.th. ishte një parti ‘futja kot’. Pra një komisioner i vetëm që kishim për të kontrolluar votat tona ku kalonin për numërim, ato nuk numëroheshin por cilësoheshin vota nga partia futja kot.

Nisur nga kjo situatë unë mendoj se ne kishim mjaftueshëm vota, sasinë e nevojshme të votave për të treguar që një formacion politik është në rrugën e duhur. Kishim sasinë e duhur për të treguar që një parti nuk ka asnjë lloj lidhje as me trafikun e drogës as me trafiqet e tjera, as me krimin e organizuar, një parti e mbajtur me shpirtrat, zemrat e një grushti njerëzish të sinqertë, ishte numri i mjaftueshëm i votave për të na treguar ne se duhet t’a vazhdojmë këtë rrugë, duhet t’a vazhdojmë këtë përpjekje. Aritmetika e numrit të votave për ne nuk kishte më asnjë rëndësi në momentin që ne nuk arritëm të numërojmë votat. Pra, në momentin që sistemi i numërimit u minua që në themel aritmetika dështoi dhe ne jemi për moralin. Ne i kishim aq vota sa për të vazhduar përpara, por numrin e votave nuk arritëm t’a merrnin vesh.

ExPress.mk: PSHA është parti e spektrit të djathtë. Pse vendosët të garonit përkrah partive të majta? Mos është kjo një tradhëti bindjesh për t’i mbijetuar skenës politike?

Kreshnik Osmani: Kjo nuk është e lidhur me ndonjë tradhëti të caktuar politike. Unë jam nga njerëzit që besoj se në Shqipëri nuk ka të djathtë dhe as të majtë të mirëfilltë ideologjikë por ka rreshtime të diktuara nga interesat e formacioneve politike. Ne jemi formacion politik që nuk ka mundur të futet në tregun politik shqiptar prej kaq vitesh dhe kjo ishte hera e parë që ne merrnim pjesë në zgjedhjet parlamentare. Duke qenë si e tillë, koalicioni Aleanca për Shqipërinë Europiane ishte një koalicion i cili i tejkalonte tekat majtiste të orientimit mazhoritar të kampit, por ishte një koalicion i të gjitha vlerave dhe i të gjithë shqiptarëve që besonin se regjimi i mëparshëm duhet ndëshkuar dhe duhet të merrte një leksion. Pra ne u mblodhëm për të shpëtuar Shqipërinë dhe do të jemi të gatshëm që t’a bëjmë këtë sa herë të jetë e nevojshme. Shqipëria vinte e lodhur dhe e rraskapitur nga një qeverisje shumë problematike e z. Berisha edhe pse ne jemi prej atyre që mendojnë se në këtë vend nuk ka engjëj dhe ne u përpoqëm të rreshtoheshim në një kamp politik i cili kishte dalë përtej të majtës dhe të djathtës. Ishte një rreshtim mbarëpopullor të cilin e tregoi rezultati i zgjedhjeve. Nuk shoh asnjë tradhëti në këtë mes, shoh vetëm impenjim, këmbëngulje në vazhdimësi të partisë që unë kam marrë përsipër të drejtoj për të qenë përkrah çdo lloj formacioni, përkrah çdo lloj nisme që ka për bazë të vihet në shërbim të shqiptarëve. Ne nuk do të marrim asnjëherë pjesë në angazhime heshtjeje vetëm për të ruajtur pozicionet tona dhe interesat tona partiake. Do jemi për të ndjekur dhe monitoruar nga afër premtimet e z. Rama dhe do të jemi aty në momentin që do të shikojmë, që nuk jemi më aty ku nisëm.

ExPress.mk: Mazhoranca PS-LSI po bën gati 1-vit që po qeverisin. A mendoni se është në rrugën e duhur dhe me kapacitetet e duhura?

Kreshnik Osmani: Një vit nuk është tërësisht i mjaftueshëm për të treguar sesi do të qeverisim, por padyshim se ai jep sinjalet e para të mënyrës sesi do të qeveriset vendi, për aq kohë sa kjo mazhorancë do t’a drejtojë vendin, për aq kohë sa çiftëzimi Rama-Meta do të drejtojë vendin. Qeveria po bën përpjekje serioze për të ndryshuar vendin por deri në këto momente është duke u marrë me estetikë. Estetika qeverisëse nuk është e mjaftueshme, vendi ka nevojë për politika qeverisëse dhe nuk ka nevojë për hartime të bukura, nuk ka nevojë për fjalime elokuente, nuk ka nevojë për dalje të bukura për njerëz bukurfolës. Shqipëria ka nevojë për njerëz që bëjnë punën mirë. Vendi ka sfida të mëdha që vijnë nga një gjendje e trashëguar kritike e cila nuk mund të ndryshohet shpejt por mendojmë se vendi, ka nevojë për reformat e mëdha dhe Partia Socialiste bashkë me aleaten e saj LSI do të gjendeshin nën trysninë e elektoratit të tyre. Këto dy parti, vazhdojnë të gjenden nën trysninë e opozitës e cila ushtroi për të ndaluar emërimet e reja që herë pas here ka shkaktuar huti në radhët e mazhorancës, huti e cila mund të përkthehet vonesë në radhët e vendimarrjes së reformave. Vendi ka nevojë për siguri, ka nevojë për rend, stabilitet politik i cili tashmë po mungon. Agresiviteti politik nuk e lejon vendin që të shkojë për atje ku është nisur. Prezenca dhunshëm e trafikut të drogës, mungesa e sigurisë janë problematika të lidhura në mënyrë të drejtpërdrejtë me stabilitetin e vendit, dhe stabiliteti i vendit është i lidhur me investimet e huaja, me mënyrën sesi partnerët dhe aleatët tanë ndërkombëtarë i lexojnë zhvilimet këtu kur mblidhen bashkë reflektojnë dhe na vendosin përballë një panorame të caktuar politike e cila duhet urgjentisht të shkëputet për të bërë dicka të mirë konkrete. Z. Rama duhet të bëjë premtimin e tij madhor që ia ka bërë shqiptarëve; që nuk do t’i gjejmë njerëzve punë, por punës njerëz.

ExPress.mk: Akti normativ i nënpunësit civil në optikën tuaj, e shihni më shumë si domosdoshmëri rinovuese të elitave në administratë, apo si një cështje ku militantët duhen të punësohen?

Kreshnik Osmani: Unë mendoj se këto çështje me ligje në Shqipëri duhet një kohë e gjatë të funksionojnë. Këtu kemi një luftë për të ruajtur gjithsecili kamp militantët e tyre, për t’i mbajtur me rrogë për t’iu përgjigjur partisë sa herë që ajo të ketë nevojë. Unë e kam shprehur mendimin tim dhe në vende të tjera, faturën e integrimit të Shqipërisë në BE nuk mund t’a paguajë vetëm një kamp politik. Kam thënë se shqiptarët, do t’a bëjnë Shqipërinë vetëm atëhere kur dhimbjet dhe lumturinë do t’a ndajnë në mënyrë të barabartë me gjithë bijët dhë bijat e kombit. Nuk është e mundur, që të themi se ajo që ka kaluar nuk kthehet më dhe faturën t’a paguajë vetëm një pjesë e shoqërisë. Jam i vetëdijshëm për investimet që kanë bërë BE për trajnimin e shumë segmenteve të administratës publike, për shpenzimin që është bërë, për kualifikimin e këtyre segmentëve, por nga ana tjetër nuk mund të themi se gabimet e të shkuarës, pra heqjet masive të njerëzve nga puna duhet t’i paguajë vetëm ajo pjesë e popullatës e cila i përket kampit politik që për momentin drejton Shqipërinë. Duhet të jemi më të ndjeshëm sepse shqiptarët janë të gjithë të barabartë, të gjithë kanë të drejta dhe detyrime të barabarta karshi shtetit të tyre, karshi ligjit dhe mendoj se bashkëpunimi politik, dialogu politik, është garancia e vetme për të zgjidhur këto situata të cilat krijojnë tensione kaq të mëdha ndërmjet shqiptarëve. Kjo nuk zgjidhet vetëm me kuadrin ligjor, por ka nevojë të zgjidhet dhe me një bashkëpunim më të madh ndërmjet opozitës dhe mazhorancës aktuale, për të gjetur një të mesme, për të gjetur një të përpjestueshme të përbashkët, e cili i mbron të drejtat edhe të asaj shtrese që sot po hiqet nga puna, por dhe asaj shtrese e cila padrejtësisht është lënë, është hedhur në rrugë për shumë vite në të kaluarën.

ExPress.mk: Prokurori i përgjithshëm z. Llalla ka deklaruar se, hetimet mbi narkotrafikun do të prekin dhe njerëz me pushtet politik. A mendoni se shefat e drogës fshihen pas kostumit të politikanit në parlament?

Kreshnik Osmani: Nuk kam fakte dhe të dhëna konkrete për të akuzuar njerëz konkretë, por nuk kam asnjë dyshim që krimi, trafiku i drogës gjatë gjithë këtyre viteve ka qenë pranë politikës dhe në raste të caktuara mund të ketë qenë edhe vetë politika. Mënyra sesi hyjnë njerëzit në parlament, ose mënyra sesi njerëzit katapultohen në politikë nga hiçi pa asnjë lloj aksioni intelektual dhe politik, të vish në krye të foltoreve më të rëndësishme të vendit, tregon se këtu, kemi lidhje indirekte me paranë e pisët, kemi lidhje me krimin e organizuar, kemi lidhje me korrupsionin. Sigurisht krimi dhe korrupsioni, lidhja e shtetit dhe e politikës me mafian, nuk është vetëm një sëmundje shqiptare, është edhe një sëmundje mbarë botërore, por do të doja të them se në Shqipëri është shumë më e theksuar. Nëse prokurori Llalla ka fakte të tilla dhe është duke kryer hetime të cilat bëjnë atë të besoj se ekzistojnë këto lidhje, me shumë kënaqësi dhe ne do t’i prisnim të zbardheshin. Le t’a lëmë prokurorin që të kryejë detyrën e tij, ku kërkohet prej tij dhe gjithë stafit të tij, prej të gjithë prokurorëve në Shqipëri që të shmangin fjetjen mbi dosje, por të hetojnë të gjitha denoncimet në lidhje me mafian, me krimin, me drogën. Padyshim që funksionimi i politikës, është i lidhur dhe me funksionimin e sistemit të drejtësisë, me gjyqësorin dhe me prokurorinë. Pavarësia e tyre është shumë e rëndësishme, por dhe puna e tyre dhe rezultatet e tyre janë shumë të rëndësishme në dhënien e goditjeve të mëdha dhe përfundimtare ndaj këtyre fenomeneve të zeza që po gërryejnë sot shoqërinë shqiptare, por dhe politikën në veçanti.

ExPress.mk: Toponimet, një cështje shumë e rëndësishme për të ardhmen e brezave. Përflitet se në pasaportat shqiptare, do të ndryshojë gjuha e shkruar, nga latinisht në atë greqisht dhe që prek thellë interesat gjuhësore, fetare dhe kombëtare. Sa jeni në dijeni për këtë?

Kreshnik Osmani: Mendoj se qeveria jonë dhe segmentet qeveritarë që po merren me këtë çështje duhet të jenë të kujdesshëm për arsye se çështja e toponimeve është shumë delikate. Lidhur me një sërë faktorësh të tjerë të cilët nuk janë të lidhur vetëm me mënyrën sesi shkruhet emri por edhe me pretendimet e tjera të fshehura nën tryezë. Ajo që unë kam dëgjuar prej ministrit të jashtëm është se ata kanë marrë tashmë një vendim, janë dakorduar me palën greke për t’u shkruar këto toponime në gjuhën ndërkombëtare (anglisht). Pritet për t’u parë, nuk kemi ende të zbardhur zyrtarisht mënyrën se si është rënë dakord.

ExPress.mk: Mazhoranca aktuale, kohët e fundit po e sulmon shumë ‘presidentin e Republikës’, duke i shkurtuar madje dhe kompetencat. A përbën kjo një hakmarrje personale midis kreut të shtetit dhe kryeministrit aktual, apo thjeshtë një luftë ku pas tyre fshihen ngjyrimet politike?

Kreshnik Osmani: Nuk besoj tek teoritë konspirative. Unë besoj tek i vetmi proces dhe ai është ruajtja dhe mbrojtja e pavarësisë së institucioneve. Kreu i shtetit është kryetari i shtetit shqiptar. Ai duhet respektuar për sa kohë e kryen në mënyrë korrekte funksionin e tij, për sa kohë ai ruan barazlargimin nga të gjitha partitë politike shqiptare. Por mendoj se në Shqipëri gjithmonë trysnia politike e ushtruar nga partitë që e kanë zgjedhur, apo që e kanë votuar presidentin e republikës, ka qenë e atillë që herë pas here mund t’a ketë shtyrë kreun e shtetit të tregojë ngjyra të njëanshmërisë. Gjithsesi mendoj se institucioni i presidencës është një institucion i cili përfaqëson krenarinë kombëtare, përfaqëson shtetin shqiptar, përfaqëson mbi politikën dhe duhet të respektohet autoriteti i këtij posti të lartë, pavarësisht emrit se kush gjendet aty. Por nuk e përjashtoj siç e thashë më parë, se këtu lindin përgjegjësi dhe për vetë institucionin e presidencës, i cili duhet të jetë i kujdesshëm, duhet të jetë mbi palët politike në vend dhe duhet të luajë rolin e babait të politikës për të gjithë klasën politike shqiptare edhe pse mënyra sesi zgjidhet presidenti në Shqipëri e kemi të qartë se nuk e vesh atë me një autoritet të tillë. Mendoj se është koha që klasa politike, qoftë mazhoranca, qoftë edhe opozita aktuale të jenë më të kujdesshëm në raport me kreun e shtetit, pasi ashtu siç e thashë dhe më parë, ai është dinjiteti i kombit.

ExPress.mk: Sipas mendimit tuaj, do ta marrë Shqipëria statusin për në Bashkimin Europian në Qershor të këtij viti?

Kreshnik Osmani: ‘BE’ ka përgjegjësitë e veta ndaj shqiptarëve dhe ndaj rajonit. Mendoj se përpjekjet për t’a ndihmuar këtë pjesë të Ballkanit për të kaluar nga faza e tranzicionit në fazën e një qeverisje më europiane nuk ka munguar. Gjatë këtyre viteve, këtë e dëshmojnë edhe fondet e shumta, dhe vizitat e shpeshta të zyrtarëve europianë në Shqipëri. Mendoj se vendimi i BE-së është një vendim i pastër politik, i lidhur me vendime të mëdha politike që i merr vetë kupola e BE-së më shumë sesa me teknalitetin. BE nuk duhet të jetë kaq e ngadaltë me Shqipërinë, por edhe me rajonin, sepse ne jetojmë në një botë e cila çdo ditë bëhet më e rrezikshme dhe kam përshtypjen se krijimi i zbrazëtirave politike nuk janë në interes dhe për vetë BE-në dhe kam përshtypjen se miqtë tanë në Bruksel po e kuptojnë këtë dhe jam i bindur që shumë shpejt do të kemi hapa pozitive lidhur më këtë. Përndryshe mendoj se rajoni do të shkojë drejt një të ardhme edhe më të brishtë se kjo që është, ku askush nuk mund të thotë me vendosmëri të plotë se çfarë do të ndodhë.

ExPress.mk: Së shpejti kemi zgjedhjet vendore, a do të garonit përsëri me këtë koalicion apo do t’i bashkoheni trenit të opozitës?

Kreshnik Osmani: Ne jemi duke ndjekur me kujdes çdo vendim, çdo segment të paraqitjes së qeverisë shqiptare, dhe do të marrim pjesë në zgjedhjet lokale, por përsa i përket rreshtimit tonë politik kjo do të jetë e lidhur me një vendim politik që do të marrë partia, vendim të cilin do ta diktojë natyra dhe mënyra sesi do të qeverisë qeveria për një periudhë jo të gjatë kohore.

kreshnik2ExPress.mk: Të flasim pak për rajonin, më saktë për shqiptarët në Maqedoni. Sipas jush, mendoni se Marrëveshja e Ohrit është një akt që doli nga lufta, apo një akt që e ndërpreu luftën?

Kreshnik Osmani: Marrëveshja e Ohrit është një domosdoshmëri politike, më e mira e mundshme, e cila ndodhi pas luftës, por është fatkeqësisht një marrëveshje politike e cila për momentin është duke rezultuar një nul, e pazbatueshme, e cila nuk po mundet të japë frutet e veta në rrafsh të interesave të shqiptarëve. Mendoj se shqiptarët vazhdojnë të gjenden nën trysninë, nën diktatin e të gjithë faktorëve politikë maqedonas. Përçarja e politikës shqiptare është duke dëmtuar rëndë interesat e shqiptarëve në Maqedoni dhe uniteti i tyre është e vetmja mënyrë për të implementuar të plotë Marrëveshjen e Ohrit. Këto marrëveshje politike të diktuara nga situata të caktuara politike nën një mbikëqyrje kombëtare janë teknika të lidhura me burokraci ligjore, më shumë sesa zgjidhje konkrete. Dhe kjo është arsyeja pse kanë kaluar kaq shumë vite dhe Marrëveshja e Ohrit është aty ku ka qenë. E vetmja mënyrë për të zbatuar këtë marrëveshje, është gjetja e rrugëve të bashkëpunimit ndërmjet faktorit politik në Maqedoni, si e vetmja mënyrë për të ruajtur interesat e shqiptarëve. Padyshim që jemi të interesuar për faktorin shqiptar, për skemën e të bërit politikë atje dhe për faktorizimin e interesave shqiptare brenda koalicioneve qeverisëse. Prandaj, faktorit politik shqiptar në Maqedoni i duhet qetësi, maturi dhe lidershipet shqiptare duhet të gjejnë mënyra për të formatuar bashkërisht interesat e shqiptarëve dhe për t’i bërë ballë palës maqedonase në tavolinë si një faktor i paneglizhueshëm, i paevitueshëm të daljes jashtë këtyre interesave dhe mënyrës, sesi politika maqedonase i sheh këto çështje. Ne i urojmë gjithë të mirat vendit tonë fqinj dhe udhë të mbarë në rrugëtimin e saj euro-atlantik. Por pa dyshim që ne jemi të interesuar më shumë për faktorin shqiptar, për etninë shqiptare, e cila na dhemb, na djeg dhe në asnjë mënyrë nuk do t’a duronim dhe nuk do t’a lejonim nëpërkëmbjen e të drejtave të tyre.

ExPress.mk: Jeni të mendimit që spektri politik shqiptar opozitar në Shqipëri, Kosovë dhe Maqedoni, herë pas here duhet të zhvillojnë takime të përbashkëta për të kordinuar politikën kombëtare?

Kreshnik Osmani: Kjo është një nga zhvillimet më normale që duhet të ndodhë. Por, ne mendojmë se vazhdojnë të jenë shqiptarët teka të partive, të kryetarëve, pengje të tekave të pëlqimeve politike të secilit lider, të secilës parti. Mendoj se është koha kur duhet të maturohemi, të piqemi politikisht e gjithë klasa politike, qoftë ajo që qeveris, qoftë edhe ajo opozitare. Kjo përsa i përket interesave të shqiptarëve në rajon, duhet të jemi më të bashkuar në përpilimin e një strategjie afatmesme dhe afatgjatë, e cila formaton interesat e shqiptarëve në rajonin e Ballkanit. Duhet ta gjejmë këtë unitet dhe duhet ta krijojmë atë edhe pse për momentin nuk ekziston, sepse vetëm të bashkuar arrijmë të performojmë edhe ndërkombëtarisht për të përthithur mbështetjen e aleatëve tanë ndërkombëtarë të kudogjendur. Ka zhvillime në rajon të cilat tregojnë qartë, se çështja kombëtare, interesat shqiptare nuk presin më. Por duhet të gjenden rrugët dhe mënyrat për të ecur përpara. Shoh që ka përpjekje të tilla, ka përpjekje për të arritur kordinimin, por ende i shoh si të pamjaftueshme në shpejtësinë e lëvizjes së tyre.

ExPress.mk: Mendoni se partitë shqiptare në Maqedoni punojnë mjaftueshëm për shqiptarët atje?

Kreshnik Osmani: Shikoj një pakënaqësi të madhe nga shqiptarët atje pavarësisht përkatësisë së tyre politike. Pra, shohim një dembelizëm, një plogështi apo një nënshtrim të lidershipit politik shqiptar, ndaj faktorit maqedonas për të ruajtur interesat të ngushta partiake më shumë se sa për të ruajtur interesat e shqiptarëve atje, paçka se edhe atje situata e kampeve shqiptare është e polarizuar dhe janë të ndarë kryesisht në dy faktorë më të rëndësishëm politikë, siç janë z. Ahmeti dhe z. Thaci. Mendoj se dhe pse përkrahësit e këtyre partive e ndjejnë të nevojshme që lidershipët e tyre duhet të jenë më agresivë karshi palës maqedonase për të ruajtur dhe për të mbrojtur interesat e tyre atje. Varfëria është çdo ditë në rritje, mjerimi është çdo ditë në rritje në zona si Gostivari, Kumanova, Tetova apo dhe në zona të tjera ku banojnë shqiptarët dhe padyshim kjo pakënaqësi e popullatës shqiptare atje, do të shohë drejt humbjes së shpresës dhe humbja e shpresës e dëmton më së shumti dhe stabilishmentin politik shqiptar në raport me përballjen e tij me palën maqedonase.

ExPress.mk: A duhet të ketë një marrëveshje të re midis palës shqiptare dhe asaj maqedonase? Si e shihni në një të ardhme të afërt perspektivën e Maqedonisë?

Kreshnik Osmani: Ne i urojmë të gjitha sukseset Maqedonisë, i urojmë mirëqenie, stabilitet dhe mendojmë se e vetmja formulë për të pasur një bashkëpunim serioz dhe konkret ndërmjet faktorit shqiptar dhe maqedonas, është ruajtja dhe përkujdesja për interesat e shqiptarëve atje. Çdo lloj përpjekje dhe çdo lloj qeverie për të injoruar interesat e shqiptarëve në Maqedoni dhe për t’i cilësuar dhe klasifikuar ato si interesa të shkallës së dytë apo të tretë, apo edhe më poshtë në mënyrë të padiskutueshme, ato cenojnë stabilitetin e Maqedonisë dhe cenimi i stabilitetit të Maqedonisë nuk është në të mirën e vetë shtetit maqedonas, por dhe as në të mirën e rajonit.

ExPress.mk: Subjekte politike dhe jopolitike në Kosovë, angazhohen për bashkimin e Kosovës me Shqipërinë. A e mbështesni ju këtë ide?

Kreshnik Osmani: Unë mendoj se Shqipëria vazhdon ende për një kohë të gjatë të gjendet në trysninë e një gabimi fatal historik, të cilin gjeopolitika e ka ndërmarrë ndaj shqiptarëve dhe është ndarja e tyre. Nuk mendoj se dëshira dhe përpjekja e shqiptarëve për bashkim shqiptar mund të cenojnë europianizimin e tyre. Ky është një patriotizëm normal dhe aspak një nacionalizëm i sëmurë. Ne mendojmë se bashkimi kombëtar është një proces i paevitueshëm, i cili do të ndodhë në momentin e duhur, para ose pas futjes në Bashkimin Europian, këtë nuk mund ta themi saktësisht sepse kjo do të diktohet edhe nga mënyra sesi do të zhvillohen ngjarjet në rajonin tonë por edhe në BE. Por pa dyshim që ky është një proces i domosdoshëm i cili formaton mirë interesat e shqiptarëve në Ballkan, por edhe i garanton stabilitet Ballkanit, një stabilitet i nevojitur për vetë Ballkanin, por e dhe për BE-në. Nuk kam të dhëna politike të mjaftueshme të cilat më lejojnë të jap data apo afate kohore lidhur me këtë bashkim kombëtar, por padyshim tek ndërgjegjet, tek dëshirat, tek mendimet, tek aspiratat e të gjithë shqiptarëve pa përjashtim, shoh një vullnet të palëkundur për ndodhjen e këtij bashkimi. Mendoj se popujt arrijnë t’i plotësojnë aspiratat e tyre me këmbëngulje, me punë dhe bashkëpunim me njëri-tjetrin. Nuk është koha të jemi më inferiorë dhe të kemi frikë të flasim për teza të tilla, por është koha kur ne miqve tanë ndërkombëtarë qoftë në Bruksel, qoftë në rajone të tjera mike dhe aleate, t’iu shprehim qartë aspiratat tona duke i shoqëruar ato dhe me axhendat përkatëse të mënyrës sesi ne e kemi perceptuar, apo konceptuar këtë bashkëpunim apo këtë bashkim kombëtar. Bashkimi Kombëtar duhet të nisë fillimisht me bashkimin kulturor, me bashkimin ekonomik, me bashkëpunim më të madh në të gjitha fushat dhe mendoj se ai është një proces i cili do të vijë më natyrshëm sesa përpiqen disa qarqe të caktuara të na e servirin.

ExPress.mk: Cili do të ishte vlerësimi juaj për eksponentët politikë shqiptarë në Maqedoni, z. Ali Ahmeti dhe z. Menduh Thaçi?

Kreshnik Osmani: Edhe pse në fakt i kam ndjekur nga shtypi, nuk kam ndonjë njohje personale për ta. Vlerësimet e mia karshi tyre janë të lidhura drejtpërdrejt me vlerësimet që miqtë e mi atje kanë respektivisht si përkrahës të z. Ali Ahmeti dhe z. Menduh Thaçi. Mendoj se duhet të harrojnë të shkuarën, duhet të tejkalojnë me dhimbje tekat e tyre politike dhe të gjejnë formula bashkëpunimi dhe të punojnë për të mirën dhe në interesin e shqiptarëve atje. Çdo formulë e cila i mban këta dy liderë të ndarë, padyshim që iu ul pikët e tyre dhe nuk i ngren ata në asnjë mënyrë në lartësinë e merituar. Tekat politike duhet të tejkalohen prej të dyja palëve dhe mendoj se duhet të gjenden ata njerëzit e urtë, ata pleqtë e urtë shqiptarë, të cilët kanë autoritetin për t’i afruar të paktën, për t’i përafruar mendimet dhe strategjitë e tyre politike nëse është tërësisht e pamundur bashkimi i tyre atje. Mendoj se ne i detyrohemi atyre një lutje të madhe e të sinqertë Zotit, që t’i japë sukses, t’i ndriçojë mendjen dhe t’i udhëzojë ata drejt gjetjes së një strategjie të vënë në funksion të mjerimit, të vënë në funksion të varfërisë, të vënë në funksion të shtypjes që ndodh vazhdimisht ndaj shqiptarëve atje. Çdo përpjekje e tyre në këtë kuadër, në këtë drejtim është e falënderuar prej nesh dhe padyshim nuk do t’ju mungojnë lutjet tona, që ata t’a gjejnë fuqinë që iu duhet për t’i bërë këto hapa të mëdha. Është koha, dhe historia na dikton neve dhe të gjithë shqiptarëve, hapa të mëdha. Dhe për hatër të Shqipërisë duhet t’i ndërmarrim ato hapa. I uroj shumë suksese të gjithë faktorit politik shqiptar atje, Tirana nuk mund të bëhet palë në projekte të tyre politike. Ne i shohim të barazlarguar interesat e të dyja palëve nga “pengmarrja” e politikave maqedonase dhe i urojmë shumë suksese atyre në të ardhmen. Mendoj se shqiptarët atje i kanë të gjitha energjitë, qoftë për të gjetur instrumentat e duhur, për të ushtruar presionin e duhur dhe të nevojshëm politik ndaj liderëve kryesorë politikë shqiptarë atje, për të gjetur formulën më të mirë politike, e cila vihet në funksion të interesave të shqiptarëve në Maqedoni.

ExPress.mk: Z. Osmani, ishte kënaqësi që ju intervistova.

Kreshnik Osmani: Faleminderit dhe ju uroj shumë suksese ju dhe stafit të gazetës Express.mk

Intervistoi: Aleksandër Rrema, Tiranë

Burimi: http://express.mk/2014/05/kreshnik-osmani-me-agresiv-karshi-pales-maqedonase-per-te-mbrojtur-interesat-kombetare/

Advertisements
  1. Ende pa komente.
  1. No trackbacks yet.

Shkruani një koment

Plotësoni më poshtë të dhënat tuaja ose klikoni mbi një nga ikonat për hyrje:

Stema e WordPress.com-it

Po komentoni duke përdorur llogarinë tuaj WordPress.com. Dilni / Ndryshoje )

Foto Twitter-i

Po komentoni duke përdorur llogarinë tuaj Twitter. Dilni / Ndryshoje )

Foto Facebook-u

Po komentoni duke përdorur llogarinë tuaj Facebook. Dilni / Ndryshoje )

Foto Google+

Po komentoni duke përdorur llogarinë tuaj Google+. Dilni / Ndryshoje )

Po lidhet me %s

Këtë e pëlqejnë %d blogues: